Nur-Sultan qalasy ákimdigi 18 qabatty «Jaina» turǵyn úi kesheninde turatyn azamattyń lift qulap ketkeni jaily jazǵan habarlamasyna túsinik berdi, dep habarlaidy "Ult aqparat".
Elorda turǵyny Instagram jelisine 18 qabatty úidiń lifti qulap ketkenin jariialaǵan bolatyn.
Ol «Jaina» turǵyn úi keshenindegi lift bos kúide qulaǵany týraly habarlady.
«Bolǵan jaǵdaiǵa qatysty kim tekserý jumystaryn júrgizedi? Bul úide balaly otbasylar turady. Bireý zardap shekse, kim jaýap berer edi? Turǵyn úidiń páter ieleri kooperativi daý-damaidy basý úshin liftke qyzmet kórsetetin kompaniiany aýystyryp, jóndeý jumysyn turǵyndardyń qarajatyna júrgizgisi keledi», - dep jazǵan qala turǵyny.
Nur-Sultan qalasy ákimdiginiń qalalyq qorshaǵan ortany baqylaý jáne sapasyn basqarý basqarmasynyń málimetinshe, «Jaina» turǵyn úi keshenindegi liftke «Lift master» kompaniiasy qyzmet kórsetedi jáne osy úidegi bloktardyń birindegi júk liftisinen aqaý shyqqan.
«Úi turǵyny túsirip alǵan OTIS markaly lift 25 qazan kúni jóndeý jumystaryn jasaý maqsatynda toqtatylǵan. Lift kompaniiasy ony jóndeý jumystarynyń quny 1,5 mln teńge dep baǵalap, akt jasaǵan. Buǵan kóńili tolmaǵan turǵyn atalǵan jaǵdaiǵa nazar aýdartý maqsatynda liftiniń qulap ketkeni týraly jalǵan aqparat jazǵan. Qazirgi ýaqytta qalǵan liftiler qalypty jaǵdaida jumys istep tur», - deidi Nur-Sultan qalasy ákimdiginiń qalalyq qorshaǵan ortany baqylaý jáne sapasyn basqarý basqarmasynyń baspasóz qyzmeti.
