Ulytaýda ótken alǵashqy Ulttyq quryltaidyń mańyzdylyǵy men aldaǵy josparlary jóninde quryltai músheleri pikir bildirdi, dep habarlaidy El.kz portaly.
"Ulttyq quryltai óte jaqsy bastama. Keremet ótti dep oilaimyn, óitkeni máseleler jaǵynan emes, Qazaqstannyń bolashaq baǵyty jaǵynan áńgimeler qozǵaldy. Eldiń qundylyqtary jóninde jáne qazaqstandyqtardy qalai eńbekke tartý týraly sóz tarqatty. Otandyq sport pen halyqtyń densaýlyǵyna qatysty mańyzdy faktorlardy esten shyǵarmady. Sonymen qatar, búgingi Ulttyq quryltaida ultaralyq jaǵynan, etnosaralyq jaǵynan aýqymdy taqyryptardy kóterdi. Kóterilgen taqyryptar boiynsha Prezidentimiz Qasym-Jomart Toqaev quryltaidyń tóraǵasy retinde barlyǵyn nazarda ustaitynyn atap ótti. Biz elimizdiń jarqyn bolashaǵy úshin qoldan kelgenshe aianyp qalmaýǵa tyrysamyz", - deidi qoldanbaly etnosaiasi zertteýler institýtynyń direktory Talǵat Qaliev.
Al biologiialyq ǵylymdar doktory, professor Kúnsulý Zakarianyń aitýynsha, Jańa Qazaqstannyń bolashaǵy jarqyn, baǵyty aiqyn. Ǵalymnyń qazaq eliniń atyn asqaqtatar bilimdi, sanaly urpaq shyǵatynyna senimi mol.
"Quryltaidyń múshesi retinde úlken jaýapkershilik arqaladym. Ulttyq Quryltaida eldi tolǵandyratyn oi-pikirler aityldy. Prezident Qasym-Jomart Toqaevtyń adal eńbekpen jumys jasaý, jastardy eńbekke baýlý týraly aitqan pikiri kóńilimizdi marqaitty. Shynymen de, eńbekke qushtar urpaq qana týǵan Otanyn alpaýyt elderdiń qataryna qosa alady", – dedi ol jiynnan soń.
