Elimizdiń úsh óńirinde sý tasqyny qaýpi seiilmei tur. Bul týraly búgin QR IIM Tótenshe jaǵdailar komitetiniń tóraǵasy Vladimir Bekker málim aitty, dep habarlaidy QazAqparat tilshisi.
«Aqmola oblysy boiynsha Tselinograd, Astrahan, Atbasar, Sandyqtaý jáne Arshaly aýdandaryndaǵy sý tasý qaýpin baqylaýda ustap otyrmyz. Atbasar qalasynda Jabai ózeni ústindegi kópirde tańerteńgi saǵat 8-de sý deńgeii táýlik ishinde 90 sm-ge kóterildi jáne kópir belgisine deiin 3,5 metrdi quraidy. Qaýipti deńgeige deiin áli 1 metr bar. Bul qar erý protsesiniń jalǵasyp jatqandyǵyn bildiredi. Atbasar qalasyna 15 tehnika jáne 5 júzý quralymen jabdyqtalǵan 50 mamannan quralǵan arnaiy top jiberildi», - dedi V.Bekker.
Sonymen qatar, komitet basshysy Nur-Sultan qalasyn aýyz sýmen qamtamasyz etip otyrǵan Viacheslav sý qoimasynda 93 paiyz sý jinalǵanyn jáne qazirgi ýaqytta sýdy sekýndyna 300 tekshe metrden astam kólemde Esil ózenine tranzittik rejimde aǵyzý júrgizilip jatqanyn aitty.
«Jalpy respýblika boiynsha ahýal turaqy ári kúrdeli. Qar erý protsesi júrip jatyr. Kún saiyn qar kólemi de azaia túsýde. Degenmen, sý tasqyny oryn alýy múmkin óńirler de bar jáne olardy baqylap otyrmyz. Atap aitqanda, Qostanai oblysynda Aqjaiyq, Qyzyljar jáne Maǵjan Jumabaev aýdandarynda, Batys Qazaqstan oblysynda Tasqala, Báiterek aýdandary men Oral qalasynda, Shyǵys Qazaqstan oblysynda Qatonqaraǵai, Altai, Shamanaiha, Glýbokoe, Besqaraǵai aýdandarynda sý tasý qaýpi joǵary», - dedi ol.
V.Bekkerdiń atap ótýinshe, osy aptada sý tasý qaýipi óte joǵary bolmaq. Sebebi aldaǵy ýaqytta joǵaryda atalǵan óńirlerdiń barlyǵynda jaýyn-shashyn bolatyndyǵy kútiledi.
