Memleket basshysy óz Joldaýynda úkimet 17 iri jobanyń tizimin jasaǵanyn atap ótti. Onda tereń óńdeý tásilin meńgerýge basymdyq berilgen. Aiýynsha, óz shikizatymyz ben qural-jabdyqtarymyzdy barynsha paidalaný, iri kásiporyndarǵa japsarlas óndirister ashý mańyzdy.
"Men jýyrda Qaraǵandy oblysynda boldym. Sol kezde «Qarmet» metallýrgiia kombinatyna bardym. Otandyq investor kelgen soń, ondaǵy ahýal edáýir turaqtaldy. Kásiporyn jańǵyrtyla bastady. Bul qadam óndiriletin ónim kólemin aitarlyqtai arttyrýǵa tiis", - dedi ol.
Sondai-aq, Saran qalasynyń ekonomikasyn ártaraptandyrý jumysy júrgizilip jatqanyn aitty. Onda avtokólik dońǵalaǵyn jáne turmystyq tehnika shyǵaratyn óndirister iske qosyldy.
"Sonyń arqasynda bul eldi meken monoqalalar sanatynan shyǵaryldy. Basqa da monoqalalarǵa dem berý úshin osy tájiribeni qoldaný qajet. Jalpy, aimaqtardyń ósip-órkendeýine jol ashatyn jańa óndiris oryndaryn barynsha damytý kerek", - dep atap ótti Prezident.
Prezident arnaiy Jarlyqpen qurylǵan Alataý qalasy týraly da aitty. Bul qala qarqyndy damityn, innovatsiia keńinen qoldanylatyn ári bilikti mamandar jumys isteitin orynǵa ainalýy qajettigin atap ótti. Úkimet onda jaily ómir súrip, tabysty eńbek etýge, investitsiia salýǵa qolaily jaǵdai jasaýǵa tiis.
"Avtokólik qurastyrý isinde oń nátijeler bar. Osy qarqyndy saqtap, jergilikti óndiris kólemin udaiy arttyrý kerek. Memlekettiń avtokólik ónerkásibine kórsetip jatqan jan-jaqty qoldaýy túptiń túbinde tolyqqandy avtokólik qurastyrý klasteri retinde eldiń igiligine ainalýy qajet", - dedi ol.
