Qazaqstandaǵy lombardtar, onlain-kompaniialar jáne mikroqarjy uiymdardyń jumystary tekserilip jatyr. Bul týraly "Ult aqparat" Qazaqstan Respýblikasynyń Qarjy naryǵyn retteý jáne damytý agenttigine silteme jasap habarlaidy.
QR Prezidenti Qasym-Jomart Toqaevtyń 2020 jylǵy 26 aqpandaǵy keńeste bergen tapsyrmasyn oryndaý maqsatynda Agenttik lombardtardyń qyzmetin zańnama talaptaryna sáikestigi, qarjy piramidasynyń belgilerin jáne zańsyz bank qyzmetin anyqtaý turǵysynan tekserý boiynsha sharalar qabyldady. Tekserýler QR Bas prokýratýrasymen, QR Qarjy ministrligimen jáne QR Ishki ister ministrligimen birlesip júzege asyrylýda.
2020 jylǵy 1 maýsymdaǵy jaǵdai boiynsha Qazaqstannyń 17 qalasynda 276 lombardqa, halyqqa qaryz beretin 11 onlain-kompaniiaǵa jáne 1 mikroqarjy uiymyna tekserý júrgizildi.
Agenttik Qazaqstan Respýblikasy Prezidentiniń tótenshe jaǵdaidy engizý nátijesinde zardap shekken halyqtyń, shaǵyn jáne orta kásipkerliktiń qaryzdary boiynsha negizgi borysh jáne syiaqy somalaryn tóleýdi toqtata turý týraly tapsyrmasyn oryndaý máselelerin tekserýde. Budan basqa, Agenttiktiń tekserý máseleleriniń aiasyna syiaqyny durys esepteý, mikrokreditter boiynsha jyldyq tiimdi syiaqy mólsherlemesiniń (JTSM) shekti mólsherin saqtaý, aiyppuldar men ósimpuldar esepteý, býhgalterlik esepti uiymdastyrý jáne júrgizý, qylmystyq jolmen alynǵan kiristerdi zańdastyrýǵa (jylystatýǵa) jáne terrorizmdi qarjylandyrýǵa qarsy is-qimyl (KJ/TQQ) týraly zańnamanyń talaptaryn saqtaý kiredi.
Prokýratýra organdarymen birlesip, Agenttik qarjy piramidasynyń jáne zańsyz bank qyzmetiniń belgilerin tekseredi. Memlekettik kirister organdary kameraldyq baqylaýdy qosa alǵanda, salyqtyq esepti uiymdastyrý jáne júrgizý máselelerin tekseredi. Ishki ister organdary úi-jailardyń qaýipsizdigin qamtamasyz etýge qoiylatyn talaptardy tekserýdi, talap etilmegen kepil múlkiniń urlanǵan nemese zańsyz jolmen alynǵan múlikti anyqtaý turǵysynan tekserýdi júzege asyrady.
Tekserýlerdiń aldyn ala nátijeleri boiynsha uiymnyń esep saiasatynyń bolmaýy bóliginde býhgalterlik esepti uiymdastyrý men júrgizý, operatsiialardy býhgalterlik esepte tiisti túrde kórsetpei júrgizý, jasalǵan qarjylyq eseptiliktiń bolmaýy; Kreditteý qaǵidalaryna sáikes kelmeý, sondai-aq qaryz shartynyń sáikes kelmeýi bóligindegi; jyldyq tiimdi syiaqy mólsherlemesiniń (JTSM) 100%-na asyp ketý jáne qaryz sharttarynda JTSM-dy kórsetpeý; bir jyldan astam merzimge qaryz berý bóliginde; kepilge salynǵan múlikti satqannan keiin qaryz alýshydan bereshektiń qaldyǵyn talap etý quqyǵy bóliginde; Uiymnyń jarǵysynda kórsetilgen qyzmet túrleriniń sáikes kelmeýi siiaqty júieli buzýshylyqtar jáne basqa buzýshylyqtar anyqtaldy.
Anyqtalǵan buzýshylyqtar boiynsha tiisti jaýapkershilik sharalaryn anyqtaý jáne qoldaný maqsatynda olardy jikteý júzege asyrylady.
