Qarjy júiesi men qarjy naryǵynyń infraqurylymy shtattyq rejimde jumys isteidi. Bul týraly QR Ulttyq bank tóraǵasy Erbolat Dosaev aitty, dep habarlaidy QazAqparat tilshisi.
«Táýelsiz Qazaqstan tarihyndaǵy buryn-sońdy bolmaǵan qaiǵyly oqiǵalarǵa bailanysty Ulttyq bank Qarjy naryǵyn retteý jáne damytý agenttigimen jáne basqa múddeli organdarmen birlesip Sizdiń tapsyrmańyz boiynsha eldegi qarjylyq jáne baǵa turaqtylyǵyn qamtamasyz etý úshin mynadai sharalardy iske asyrdy. Tótenshe jaǵdai rejimi kezinde bergen Sizdiń shuǵyl tapsyrmalaryńyz sheńberinde qarjy júiesi qysqa merzimde shtattyq jumys rejimine qaita oraldy, osy jylǵy 7 qańtardan bastap halyqqa arnalǵan negizgi banktik jáne basqa da qarjylyq servister kezeń-kezeńimen qalpyna keltirildi», dedi ol Prezidenttiń biznes ókildermen kezdesýi barysynda.
Onyń atap ótýinshe, biylǵy jylǵy 10 qańtardan bastap aqsha jáne qor naryqtaryndaǵy operatsiialar qaita iske qosyldy. Ulttyq Bank standartty quraldarǵa qosymsha Qazaqstan qor birjasynda repo jáne svop operatsiialary arqyly ótimdilikti usyný boiynsha operatsiialar júrgizdi. Biylǵy jylǵy 18 qańtarda jaǵdai turaqtanǵannan keiin ótimdilikti usyný boiynsha arnaiy quraldardy paidalaný toqtatyldy.
«Ulttyq bank naryqty qolma-qol shetel valiýtasymen jáne ulttyq valiýtamen úzdiksiz tolyqtyryp otyrýdy qamtamasyz etti, ekinshi deńgeidegi bankterdiń barlyq suratýlary tolyq kólemde qanaǵattandyryldy. Biylǵy jylǵy 12 qańtarda Qazaqstan qor birjasynyń valiýtalyq alańynda tolyqqandy saýda-sattyq qaita iske qosyldy jáne halyqaralyq tólemder men aýdarymdardy júrgizý qamtamasyz etildi. Búginde qarjy júiesi men qarjy naryǵynyń infraqurylymy shtattyq rejimde jumys isteidi jáne barlyq qyzmet túrlerin kórsetedi», dedi Erbolat Dosaev.
