QR IIDM vitse-ministri Berik Kamalievtiń tóraǵalyǵymen azamattyq aviatsiiany damytý máseleleri boiynsha salalyq keńes ótti, dep habarlaidy "Ult aqparat" ministrliktiń baspasóz qyzmetine silteme jasap.
Is-sharaǵa Azamattyq aviatsiia komitetiniń, "Qazaqstannyń aviatsiialyq ákimshiligi" AQ, aviatsiia kásiporyndarynyń, "Atameken" UKP, shaǵyn aviatsiia qaýymdastyǵy ókilderi men ardagerler qatysty.
Ótken jyldyń qorytyndylary men 2022 jylǵa arnalǵan josparlar talqylanǵan keńes barysynda QR IIDM Azamattyq aviatsiia komiteti ushý qaýipsizdigi deńgeiin, ishki jáne halyqaralyq áýe qatynasyn arttyrý, áýe kóligi infraqurylymyn jańǵyrtý baǵytynda atqarylyp jatqan jumystar jóninde baiandady.
Komitet tóraǵasy Talǵat Lastaev keltirgen derekter boiynsha, IKAO-nyń Úilestirilgen validatsiialyq missiiasy sheńberinde halyqaralyq aýditorlardyń táýelsiz tekserýi qorytyndysynda Qazaqstan ushý qaýipsizdigin qamtamasyz etý deńgeiin 84%-ǵa deiin kóterdi. Bul - ortasha álemdik kórsetkishten 15% joǵary.
"Zańnamalyq jumystar sheńberinde ushqyshsyz ushatyn apparattardy paidalanýdy retteý normasyn, atap aitqanda sertifikattaý rásimin engizý, qashyqtyqtan sáikestendirýge qoiylatyn talaptardy belgileý jáne olardy paidalanatyn aimaqtardy aiqyndaý qarastyrylýda.
Sondai-aq, áýe kompaniialaryna ushýǵa shekteý qoiylatyn adamdardyń jeke tizimin jasaýǵa múmkindik beretin norma engizilmek. Oǵan ushaqta tártip buzǵan jáne onysy zańmen dáleldengen adamdar ǵana enýi tiis.
Elimizde áýe kóligi infraqurylymyn jańǵyrtý aiasynda qazir 6 nysanda jumystar júrip jatyr. Olar - Shymkent áýejaiynyń jańa terminalynyń qurylysy, Oral áýejaiynyń terminalyn, Qostanai áýejaiynyń aerovokzal keshenin, Óskemen áýejaiynyń ushý-qoný jolaǵyn, Úrjar jáne Úsharal áýejailaryn jańǵyrtý jobalary" - delingen habarlamada.
Keńeste salany áýe otynmen qamtamasyz etý, tariftik saiasat jáne mamandarǵa qatysty máseleler talqylandy. Jyl saiyn munai óńdeý zaýyttaryndaǵy jóndeý jumystaryna bailanysty aviaotyn tapshylyǵy týyndaidy. Qazir jaǵdaiy birshama turaqtandy, alaida máseleni júieli sheshý úshin QR IIDM qysqa jáne uzaq merzimdi perspektivaǵa usynystar daiyndap, olar QR Energetika ministrligimen birge pysyqtalýda.
"Aldaǵy eki jylda ushý qaýipsizdigi standarttaryna sáikestik deńgeiin 90%-dan asyryp, IKAO aýditinen sátti ótý negizgi mindet bolyp otyr. AQSh-qa tikelei reister ashý sheńberinde Qazaqstannyń aviatsiialyq ákimshiligi men AQSh-tyń kólik qaýipsizdigi ákimshiligi arasyndaǵy yntymaqtastyq jalǵasady.
Sondai-aq, "Qýatty óńirler - el damýynyń draiveri" ulttyq jobasy aiasynda álemdegi epidemiologiialyq jaǵdaidyń jaqsarýyna jáne infraqurylymdyq obektilerdiń jańǵyrtylýyna qarai pandemiiaǵa deiingi deńgeidegi halyqaralyq qatynasty qalpyna keltirý jumystary jalǵasady" - delingen habarlamada.
