Elimizde jyl basynan beri 34 bala sýǵa tunshyǵyp mert boldy. Bul týraly QR TJM Azamattyq qorǵanys jáne áskeri bólimder komitetiniń tóraǵasy Baýyrjan Syzdyqov aitty, dep habarlaidy "Ult aqparat".
«Qabyldanǵan is-sharalarǵa qaramastan jyl basynan beri balalardy qaraýsyz qaldyrý kesirinen, belgilenbegen jerde sýǵa túsýdiń saldarynan 34 bala qaza tapty. Jalpy, jyl basnan beri Tótenshe jaǵdailar ministrliginiń mamandary 48adamdy, onyń ishinde 6 balany qutqardy», - dedi komitet tóraǵasy Ortalyq kommýnikatsiialar qyzmetindegi baspasóz máslihaty barysynda.
Komitet basshysynyń dereginshe, elimizde sýǵa túsýge arnalǵan 469 oryn bar. Onyń 118-i kommýnaldyq jáne 275-si jekemenshik jaǵajai sanalady. Aita keterligi, jyl basynan beri Tótenshe jaǵdailar ministrligi ortalyq jáne jergilikti atqarýshy organdarmen birlesip, sý qoinaýlarynda oryn alatyn tótenshe oqiǵalar táýekelin tómendetýge baǵyttalǵan keshendi is-sharalardy qolǵa alyp, der ýaqytynda júrgizip jatyr. Máselen, 31 naýryzda Tótenshe jaǵdailar ministriniń buiryǵymen barlyq deńgeidegi ákimdikter men memlekettik organdardyń mindeti aiqyndalǵan. Shomylý maýsymyn ótkizýge ortalyq jáne jergilikti atqarýshy organdardyń daiyndyq máseleleri jónindegi vedomstvoaralyq memlekettik komissiianyń otyrysy ótkizilgen.
«Óńirlerde sýdaǵy qaýipsizdikti qamtamasyz etý máseleleri barlyq deńgeidegi tótenshe jaǵdailar jónindegi komissiialardyń otyrysynda qaraldy», - dedi Baýyrjan Syzdyqov.
