Qazaqstanda jastardy qoldaýdyń 2025 jylǵa deiingi keshendi jospary ázirlenip, jastar saiasaty salasyndaǵy zańnama jetildiriledi. Bul týraly halyqqa esep berý kezdesýinde Aqparat jáne qoǵamdyq damý ministri Aida Balaeva málim etti, dep habarlaidy QazAqparat
«Ózderińiz biletindei, byltyr Qazaqstannyń Tuńǵysh Prezidenti – Elbasy Nursultan Nazarbaevtyń jariialaýymen «Jastar jyly» ótken bolatyn. Jalpy «Jastar jyly» sheńberinde búkil el boiynsha 300 resýpblikalyq shara ótip, oǵan 2 millionnan astam jas, al arnaiy sharalarǵa 800 myńǵa tarta adam tartyldy. Nur-Sultan, Almaty jáne Shymkent qalalarynda jumys isteitin jastarǵa, sonyń ishinde jas otbasylarǵa 3 myń jaldamaly páter berildi. Jalpy bul baǵytta jastarǵa barlyǵy 9 myń páter berý josparlanǵan», - dedi Aida Balaeva OKQ alańy arqyly halyqqa esep berý kezdesýinde.
Ministrdiń aitýynsha, «Jas kásipker» jobasy aiasynda 5 myń adam memleketten grant alyp, jas kásipker atanǵan. Sonymen qatar, 10 myń jas kásipker shaǵyn nesie berý arqyly óz óndirisin keńeitken. Onyń kóp bóligi aýyl jastaryna berilip otyr. «Jasyl el» jobasymen 2019 jyly 20 myńnan astam adam qamtylǵan.
«Diplommen aýylǵa» baǵdarlamasy boiynsha mamandarǵa beriletin birjolǵy járdemaqy mólsheri 70 AEK-ten 100 AEK-ke deiin ósti. Jas ǵalymdardyń fýndamentaldy jáne qoldanbaly zertteýlerine baǵyttalǵan granttyq qarjylandyrý 2020 jyldan bastap 3 jyldyń ishinde 3 milliard teńgege ulǵaiady. «Stýdenttik áleýmettik nesie» júiesin engizý arqyly volonterlik qyzmetpen ainalysatyn Joǵary oqý oryndarynyń stýdentterine stipendiia 30%-ǵa ósti. Jastar jyly jastardy qoldaý úshin kóptegen shara qabyldandy. Eń bastysy, jastar saiasaty aiasynda odan ári júieli sharalardy ázirleýge serpin berildi», - dedi Aida Balaeva.
Ministr biyl Qazaqstanda jastardy qoldaýdyń 2025 jylǵa deiingi keshendi jospary ázirlenetinin jetkizdi. Sonymen qatar elimizde jastar saiasaty salasyndaǵy zańnamany jetildirý boiynsha amal-ádister qolǵa alynatynyn málim etti.
«Nur-Sultan qalasyndaǵy «QazExpoCongress» pavilonynda «ArtHUB» jastar bastamasyn qoldaý ortalyǵyn qurý kózdelgen. Bul alań arqyly kreativti jáne shyǵarmashyl jastar óziniń ideiasyn batyl júzege asyra alady. Dál sol jerde jastar uiymdary men volonterlardyń front-keńseleri shoǵyrlanady», - dedi ol.
