Óskemende AQSh Qorǵanys ministrligi Qaýip-qaterlerdi azaitý agenttiginiń qoldaýymen (DTRA) salynǵan Qazaqstan Respýblikasynyń Ulttyq ulany Daǵdarysqa qarsy oqý ortalyǵy resmi ashyldy. Bul týraly Atomdyq jáne energetikalyq qadaǵalaý men baqylaý komitetiniń baspasóz qyzmeti habarlady.
Nysan 1993 jylǵy 13 jeltoqsandaǵy AQSh pen Qazaqstan Respýblikasynyń arasyndaǵy úkimetaralyq kelisimge sáikes Qazaqstanda iske asyrylyp jatqan «Jahandyq iadrolyq qaýipsizdik» birlesken baǵdarlamasynyń aiasynda salynǵan bolatyn. Baǵdarlamanyń maqsaty – adamdar men qorshaǵan ortany qorǵaý, iadrolyq nysandardy qorǵaý úshin myqty ári senimdi iadrolyq jáne fizikalyq qaýipsizdik júiesin qurý. Qazaqstan Respýblikasynda baǵdarlamanyń úilestirýshi organy Atomdyq jáne energetikalyq qadaǵalaý men baqylaý komiteti bolyp otyr.
Ortalyqtyń resmi ashylý saltanatyna QR EM Atomdyq jáne energetikalyq baqylaý men qadaǵalaý komiteti tóraǵasynyń orynbasary Ǵumar Sergazin qatysty.
«Daǵdarysqa qarsy oqý ortalyǵy Qazaqstannyń iadrolyq nysandaryn qorǵaýǵa jaýapty áskeri bólimderdiń quramyn daiarlaý jáne olardyń biliktiligin arttyrýǵa arnalǵan. Sonymen qatar ortalyqtyń oqý josparlary mamandardy taktikalyq daiyndaýǵa, avariialyq jaǵdailarǵa den qoiýǵa, obektilerdi fizikalyq qorǵaýdyń zamanaýi júielerin, kompiýterlik qaýipsizdikti zerdeleýge, iadrolyq materialdardy baqylaý jáne olardy qaýipsiz saqtaýdy qamtamasyz etý máselelerine oqytýdy kózdeidi», - dedi komitetten.
