Qazaqstanda aqsha-nesielik saiasat, valiýtalyq saiasat turaqty. Bul týraly Parlament Májilisinde tilshiler saýalyna jaýap bergen Ulttyq bank tóraǵasy Erbolat Dosaev málimdedi, dep habarlaidy "Ult aqparat".
«Qazirgi baǵamdyq valiýtalyq saiasat búginde oryn alyp otyrǵan ózgeristerge sai keledi. Infliatsiialyq targetteý saiasaty elde tolyq kólemde júzege asyrylýda», - dep toqtaldy UB basshysy devalvatsiiaǵa qatysty taraǵan qaýeset boiynsha tilshiler saýalyna jaýap bere otyryp.
Onyń paiymynsha infliatsiia boiynsha tórt aidyń nátijesi bul kórsetkishtiń qajetti dálizde turǵanyn baiqatyp otyr.
«Elimizde aqsha-nesielik saiasat, valiýtalyq saiasat turaqty. Devalvatsiia bola ma, bolmai ma, ony talqylaýǵa zaýqym joq, ol jaǵyn áleýmettik jelilerge qaldyrdym. Men óz jumysymdy isteýim kerek. Ulttyq bank óz saiasaty arqyly azamattar men biznestiń senimin qaitarady. Eger saiasat naryq jaǵdaiyna sáikes kelse, bári jaqsy bolady degen sóz", - dedi ol májilis kýlýarynda.
Dosaev elimizde infliatsiialyq targetteý saiasaty tolyq kólemde júzege asyrylyp jatqanyn atap ótti.
"Áleýmettik jeliler adamdardyń óz pikirin aitýǵa, talqylaýǵa degen múmkindikterin keńeitti. Biraq qaýeset ár zamanda da bolǵan", - dedi ol.
Buǵan deiin Dosaevtyń orynbasary Oleg Smoliakov ta devalvatsiiaǵa qatysty pikir bildirip, prezident sailaýynan keiin teńge baǵamy kúrt qubylmaitynyn málimdegen edi.
Aita keteiik, biylǵy jylǵy sáýirde ailyq infliatsiia 0,5 paiyzdy qurady.
Jyldyq infliatsiia 2019 jylǵa arnalǵan 4-6 paiyzdyq nysanaly dáliz sheginde turaqtaldy jáne sáýir aiynyń qorytyndysy boiynsha 4,9 paiyz deńgeiinde qalyptasty.
