Elimizdiń alty óńirinde úkimettik emes uiym ókilderi iskerlik qazaq tilin meńgerdi. Bastama basqa oblystarda da júzege asyrylady. Bul týraly Qazaqstan Azamattyq aliansynyń vitse-prezidenti Dos Kóshim aitty, dep habarlaidy "Ult aqparat" Qazaqstan Azamattyq aliansynyń baspasóz qyzmetine silteme jasap.
Almaty, Soltústik Qazaqstan, Aqmola, Jambyl, Qostanai oblystary men Nur-Sultan qalasynda úkimettik emes uiym ókilderi iskerlik qazaq tilin meńgerdi.
«Qazaqstanda birinshi synyp oqýshylarynyń 90%-y qazaq bólimderine bardy, bul qoǵam – tildi meńgerý qajettiligin túsinetinin bildiredi» - deidi Qazaqstan Azamattyq aliansynyń vitse-prezidenti Dos Kóshim.
Kezdesýge qoǵam qairatkeri, saiasatker Rasýl Jumalymen birge «Azamattyq bastamalardy qoldaý ortalyǵy» KEAQ-nyń qoldaýymen iske asyrylǵan «Úkimettik emes uiymdar arasynda memlekettik tildi ilgeriletý boiynsha is-sharalardy uiymdastyrý» jobasyn ázirleýshiler men negizgi úiretýshiler keldi.
«Sarapshylar úkimettik emes uiym ókilderi arasynda memlekettik tildi bilý deńgeiin baǵalap, zertteý jumystaryn júrgizgen. Olardyń árqaisysynda oqý seminarlary ótkizilgen. Oqytý nátijeleri aqparattyq beinerolikte kórsetilip, spikerler jýrnalisterdiń suraqtaryna jaýap berdi», - delingen habarlamada.
