Foto: ashyq derekkóz
Elimizde turmystyq qatty qaldyqtardy (TQQ) jinaýǵa, suryptaýǵa jáne kómýge arnalǵan tarifter arnaiy kásiporyndardyń shyǵyndaryn jabýdy qamtamasyz etpeidi. Bul týraly QR Premer-ministri Oljas Bektenovtiń tóraǵalyǵymen ótken Úkimet otyrysynda ekologiia jáne tabiǵi resýrstar ministri Erlan Nysanbaev málimdedi, dep habarlaidy Ult.kz.
Respýblikada jyl saiyn 4,5 mln tonnadan astam qaldyqtar túziledi, bul rette 2024 jyly qaita óńdeý deńgeii shamamen 26%-dy qurady, bul josparlanǵan 30%-dan tómen. Atalǵan máseleni sheshý úshin ministr memlekettik-jekeshelik áriptestik (MJÁ) tetigin engizýdi usyndy. Osy tetik sheńberinde TQQ-ǵa shekti, ekonomikalyq negizdelgen tarifti bekitý, sondai-aq ony ákimdikter deńgeiinde belgileý jónindegi quziretti aiqyndaý usynylýda. Ol boiynsha qazirgi jáne usynylatyn tarifter arasyndaǵy aiyrmashylyqty ýtil alymdary esebinen jabý josparlanyp otyr.
Buǵan qosa, Memleket basshysynyń iri qalalarda qoqys óńdeý zaýyttaryn salý jónindegi tapsyrmasyn iske asyrý sheńberinde ýtil alymdary esebinen jeńildikpen qarjylandyrý tetigi bekitildi. Ol ýtil tólemi esebinen qarjylandyrylatyn, tólemder boiynsha eki jylǵa deiingi demalysy bar jyldyq 3%-dan 15 jylǵa deiingi qaryzdardy qamtidy. Búgingi tańda Ministrlik ákimdikter usynǵan quny shamamen 317 mlrd teńge bolatyn 67 jobany maquldady, onyń 43-i qaldyqtardy qaita óńdeýge baǵyttalǵan.
Ministrlik júrgizgen taldaý óńirlerde jobalardy iske asyrý jáne qaitalama shikizatty barynsha óndirý kezinde turmystyq qatty qaldyqtardy qaita óńdeý jónindegi qýattardy ulǵaitý úshin aitarlyqtai áleýet bar ekenin kórsetti.
Sondai-aq, elimizde qaldyqtardy basqarý talaptary boiynsha ekologiialyq zańnamany buzǵany úshin 2022 jyldan 2024 jylǵa deiin 14,3 mlrd teńge somasyna 405 aiyppul salyndy.
Eń mańyzdy jaǵdailardyń qatarynda qaldyqtardy qajetti ekologiialyq ruqsatsyz jinaǵany úshin «Kaspii Munai» AQ-ǵa salynǵan 13,7 mlrd teńge mólsherindegi aiyppul bar. «AltyntauKokshetau» AQ jáne «Qarjy-investitsiialyq korporatsiia» AQ normativten tys qaldyqtardy jinaǵany úshin jaýapqa tartyldy, olar tiisinshe 145 mln teńge jáne 108,7 mln teńgeni qurady.
Qoldanystaǵy zańnamaǵa sáikes árbir kásiporyn qaldyqtardyń kólemin azaitý maqsatynda eń úzdik qoljetimdi tehnikany paidalanýdy eskere otyryp, qaldyqtardy basqarý baǵdarlamasyn ázirleýge mindetti ekenin atap ótken jón.
