Elimizde biler institýtyn jańǵyrtý baǵytynda Joǵarǵy Sot pen Qazaqstan musylmandary dini basqarmasy birlesken jobalardy júzege asyrýdy qolǵa almaq, dep habarlaidy "Ult aqparat" QMDB baspasóz qyzmetine silteme jasap.
Qazaqstan musylmandary dini basqarmasynyń tóraǵasy Serikbai qajy Oraz Astanada QR Joǵarǵy sot tóraǵasynyń keńesshisi Saǵatbek Súleimenmen kezdesti.
Kezdesýde Joǵarǵy Sot tóraǵasynyń keńesshisi Bas múftige elimizde biler institýtyn jańǵyrtý boiynsha birlesken jobalardy júzege asyrýdy usyndy. Atap aitqanda, azamattardy sotqa deiin tatýlastyrý, bitimge shaqyrý, araaǵaiyndyq dástúrdi qaita jańǵyrtý boiynsha birlese qyzmet etý máselesi sóz boldy. Saǵatbek Súleimen bul baǵyttaǵy jobalardy júzege asyrýda múftiiat qyzmetkerleri men imam-moldalardyń yqpalyn airyqsha atap ótti.
Óz kezeginde Qazaqstan musylmandary dini basqarmasynyń tóraǵasy Serikbai qajy Oraz: «Halyqty birlik pen izgilikke, tatýlyq pen meiirbandyqqa úndeý - múftiiattyń negizgi qyzmetteriniń biri. Biz bul baǵytta birlese jumys jasaýǵa ázirmiz. Halyqty ymyra men bitimge, ózara kelisimge shaqyrý - túrli mekemede túrli missiiany atqaryp otyrǵan jetekshi tulǵalardyń asyl mindeti. «Saýsaq birikpei, ine ilikpeidi», - degen naqyl bar. Biz biriksek, izgi is-sharalar men igi jobalardy júieli túrde júzege asyratyn bolamyz», - dedi.
Basqosýda taraptar QR Joǵarǵy Soty men QMDB arasynda arnaiy memorandým qabyldaýǵa ýaǵdalasty. Sonymen qatar, jurtshylyq arasynda túsindirý jumystaryn júrgizýge, konferentsiialar men dóńgelek ústel, arnaiy basqosýlar ótkizýge kelisti.
Eske sala keteiik, Qazaqstanda tatýlastyrý jáne daýdy sotqa deiin retteý sharasyn qoldaný aiasyn keńeitý maqsatynda 2015 jyly Elbasynyń bastamasymen Azamattyq protsestik kodeksi qabyldanǵan bolatyn.
