Qazaqstannyń depozitterge kepildik berý qory salymshylardyń depozitterin óteý ýaqytyn qysqartty, dep habarlaidy "Ult aqparat".
4 shildede Prezident Qasym-Jomart Toqaev «Qazaqstan Respýblikasynyń keibir zańnamalyq aktilerine qarjy naryǵyn retteý jáne damytý, mikroqarjy qyzmeti jáne salyq salý máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoidy.
Zańda bank dármensiz bolǵan jaǵdaida Qazaqstannyń depozitterge kepildik berý qorynyń (QDKBQ) rezervinen salymshylarǵa ótem tóleý merzimin qysqartýy qarastyrylǵan.
Zańnyń jańa normasy 2020 jyldyń 1 qańtarynan bastap kúshine enedi. «Qazirgi ýaqytta mynadai norma qoldanylady: QDKBQ bankti májbúrlep taratý týraly sot sheshimi zańdy kúshine engen kúnnen bastap 14 jumys kúni ishinde ótem tóleýdi bastaidy. Is júzinde, tipti árbir kezeńdi, sonyń ishinde apelliatsiialyq is júrgizýdi eskere otyryp, sottarda isterdi jedel qaraǵan kezde de sot rásimderi bank litsenziiasynan aiyrylǵan kúnnen bastap 4-5 aiǵa sozylýy múmkin», - delingen Qordyń habarlamasynda.
2018-2019 jyly bul norma «Astana Banki» AQ, «Qazaq Banki» AQ jáne «Qazaqstan Eksimbanki» AQ 286 myń salymshysyna qatysty qoldanyldy.
QDKBQ úsh banktiń klientteri aldyndaǵy óz mindettemelerin ýaqytynda oryndaýǵa kiristi. Osydan soń QDKBQ Qazaqstan Ulttyq bankine qarjy uiymy dármensiz bolǵan jaǵdaida salymshylarǵa óz aqshasyn tezirek alýǵa múmkindik beretin bastama usyndy. Bul bastama Parlament Májilisi men Senaty tarapynan qoldaý tapty.
1 qańtardan bastap depozitterge kepildik berý júiesine qatysýshy bankti barlyq bank operatsiialaryn júrgizýge berilgen litsenziiadan aiyrý QDKBQ qarajatynan ótem tóleýge negiz bolatyn bolady.
Osylaisha, keiinnen sotqa talap aryz berý jyldamdyǵyna, sottarda isterdi qaraý jáne yqtimal apelliatsiialyq shaǵymdarǵa qaramastan, bank salymshylary-jeke tulǵalar men jeke kásipkerler barlyq bank operatsiialaryn júrgizýge litsenziiadan bank aiyrǵan kúnnen bastap 35 jumys kúninen keshiktirmei QDKBQ rezervinen tólem alady.
Qazaqstandyqtardyń depozittik shottarynyń 99,8% jinaqtalǵan syiaqyny esepke ala otyryp, tolyq somaǵa QDKBQ kepildigimen qorǵalǵan. Taratylatyn úsh bank salymshylarynyń 95%-y tolyq somaǵa ótemaqy aldy nemese alýǵa quqyly. Tólem merziminiń qysqarýymen Qazaqstanda depozitterge kepildik berý júiesi tiimdi bolyp otyr.
