Elimizde onkologiialyq aýrýlardy, astma men diabetti, parkinson aýrýlaryn tehnikalyq qarasoramen emdeý ádisi jolǵa qoiylmaq.
«Shetel azamaty bolsam da, Qazaqstanda biz tórt jyl boiy jumys istep kelemiz. Qazaqstanda zamanǵa sai meditsinalyq tehnologiialardy, noý-haýlardy paidalana otyryp, halyqqa paidaly bolý úshin tehnikalyq qarasorany meditsinalyq maqsatta paidalanýdy jolǵa qoiýdy kózdep otyrmyz. Qazirgi tańda álem boiynsha AQSh, Izrail, Germaniia, Kanadada onkologiialyq aýrýlarǵa dýshar bolǵan adamdardy tehnikalyq qarasorany paidalana otyryp emdeidi. Meniń ózim de Qazaqstanda onkologiiamen aýrýhanaǵa túsken edim. Biraq, maǵan Almatyda Qazaqstannyń dárigerleri emdep shyqty. Mine, sodan beri Qazaqstanǵa ózimdi qaryzdarmyn dep esepteimin», - deidi «RAIS Medicann International» kompaniiasynyń bas direktory Zamik Rahimov Nazarbaev Ýniversitetiniń Meditsina mektebinde ótken Tehnikalyq qarasorany meditsinalyq maqsatta paidalaný boiynsha jahandyq forýmda.
Onyń aitýyna qaraǵanda, tehnikalyq qarasora onkologiia, diabet, astma, parkinson, epilepsiia aýrýlaryn emdeýde óte paidaly.
«Dálelderimiz jeterlik. Qazirgi tańda biz Úkimet múshelerimen kezdesip, kelissózder júrgizip jatyrmyz. Ol taraptan da bizge zor qoldaý bar. Nazarbaev Ýniversiteti de bizge úlken qoldaý bildirýde. Qysqa ýaqyttyń ishinde memleket tarapynan qoldaý taýyp, bul jumysty jandandyramyz degen úmittemin. Alǵashqy satyda Almaty oblysynda tehnikalyq qarasorany ósiretin jylyjai men ony óńdeitin zaýyt salýdy kózdeýdemiz. Sonymen birge, klinika ashý mindeti tur. Klinika 2020 jyldyń ekinshi toqsanynda ashylmaq. Ol emhanada onkologiialyq aýrýlarǵa, astma men diabetke dýshar bolǵan patsientterdi qabyldaityn bolamyz», - deidi ol.
Zamik Rahimovtyń aitýyna qaraǵanda, tehnikalyq qarasorany paidalaný himiiaterapiiany azaityp, tabiǵi jolmen emdeýge múmkindik beredi.
«Máselen, patsient bizge kelgende emhanada naqty diagnoz qoiylady. Osyǵan qarai, komponentterdi ázirleitin bolamyz. Búgingi kúni Izrail, AQSh pen Kanada eliniń tájiribelerine súiene otyryp, osy amal-ádistiń 6 aidyń ishinde oń áserin kórsetetinin anyqtadyq. Adamdardy qaýipti aýrýlardan qutqara otyryp, bizdiń laborotoriia Ortalyq Aziia ǵana emes, Reseiden patsientter kelip emdeletin ortalyqqa ainalsa degen úmitimiz bar», - deidi ol.
Qarasoranyń ózi QR Ishki ister ministrligi tarapynan baqylaýǵa alynǵan ósimdik ekeni belgili. Tehnikalyq qarasorany ósirý zańnamalyq turǵyda qalai retteledi? Atalmysh suraqqa jaýap bergen Zamik Rahimovtyń aitýynsha, bul rette izraildik zańnamany negizge ala otyryp, elimizde tehnikalyq qarasorany ósirip, óńdeýdi retteitin zań jobasy ázirlenedi.
«IIM-men birge zań jobasyn birge ázirleitin bolamyz. Bul jerde tehnikalyq qarasorany ósirýden bastap óńdeýge deiingi aýqymdy jumys IIM-men retteletinin aita ketkim keledi. Tipti qarasora ósiriletin jylyjaida beinebaqylaý kamerasy ornatylyp, arnaiy kúzet qoiylady. Demek, bul jerde de damyǵan elderdiń tájiribesin qoldanamyz», - deidi Z.Rahimov.
