«Maqta salasyn damytý týraly» Qazaqstan Respýblikasy zańynyń kúshi joiyldy dep taný jáne Qazaqstan Respýblikasynyń keibir zańnamalyq aktilerine ózgerister engizý týraly» zań jobasy birinshi oqylymda maquldandy, dep habarlaidy "Ult aqparat".
Atalǵan zań jobasy maqta salasyndaǵy ákimshilik kedergilerdi azaitý jáne qarjy uiymdarynyń kredittik resýrstaryn qosa alǵanda, investitsiialar tartý úshin jaǵdai jasaý maqsatynda ázirlendi.
«Maqta salasyn damytý týraly» zańynyń quqyq qoldaný praktikasyna júrgizilgen taldaý salalyq zańda kózdelgen salany memlekettik retteý quraldary – maqta qolhaty jáne ony qamtamasyz etý jónindegi sharalar salany damytatyn qozǵaýshy kúshke ainalmaǵanyn kórsetti», - delingen qujat boiynsha ázirlengen qortyndyda.
Zańnamada kózdelgen maqta qolhattaryn qamtamasyz etý jónindegi júie salanyń sýbektileri arasyndaǵy kedergi bolyp otyr. Al bul óz kezeginde saladan investitsiialar men aqsha qarajatynyń ketýine jáne onyń barlyq negizgi kórsetkishteriniń tómendeýine alyp keledi.
Májilisiniń depýtaty Sáken Qanybekovtyń aitýynsha, salanyń toqyraýyn týǵyzatyn problemalar maqta ósirýshilerdiń, ýákiletti memlekettik organdardyń, jergilikti memlekettik organdardyń ókilderi men QR Parlamenti depýtattarynyń qatysýymen ártúrli dialog alańdarynda birneshe ret talqylandy. Barlyq derlik múddeli taraptar salanyń tartymdy bolmaýy onyń shamadan tys ári tiimsiz rettelýinen týyndap otyr degen pikirge toqtady.
Osyǵan bailanysty, saladaǵy problemalardy zańnamalyq turǵydan sheshý maqsatynda Parlament depýtattary osy zań jobasyn ázirledi, onda bir mezgilde qoldanystaǵy zańnamanyń normalaryna tiisti ózgerister engize otyryp, salalyq zańnyń kúshin joiý arqyly maqta qolhattary júiesin qaita retteý usynylady.
Taratylǵan málimetke qaraǵanda, maqta qolhattaryn shyǵara otyryp, qoima qyzmeti boiynsha qyzmetter kórsetý jónindegi maqta óńdeý uiymdarynyń qyzmetin litsenziialaý alyp tastalady.
