Din isteri jáne azamattyq qoǵam ministrliginiń ókilderi saqal men balaqtyń uzyndyǵy din týraldy zańda aitylmaitynyn málimdedi. Bul týraly din isteri komiteti tóraǵasynyń mindetin atqarýshy Erkin Ońǵarbaev aitty, - dep habarlaidy "Ult aqparat" kaz.tengrinews.kz portalyna silteme jasap.
Munda "Qazaqstan Respýblikasynyń keibir zańnamalyq aktilerine dini qyzmet jáne dini birlestikter máseleleri boiynsha ózgerister men tolyqtyrýlar engizý týraly" zań jobasy jaily aitylyp otyr.
"Qazirgi ýaqytta bul másele qarastylyrylyp otyrǵan joq: qysqa balaq shalbar men saqal (...) Tájikstanda mundai normalar qabyldanǵan, Sintszian-Uiǵyr avtonomiialyq okrýginde de bar, osy máseleni retteitin erejeler men normativtik aktiler bekitilgen. Búginde biz mundai normany qabyldamaimyz. Sebebi qandai jaǵdai bolsa da bul zańdy iske asyrý úshin zań aiasyndaǵy normativtik aktiler qajet. Quzyrly memlekettik organdar aldaǵy ýaqytta mundai zańdy iske asyrý úshin qandai da bir qadamdardy qarastyrýy qajet", - dedi Ońǵarbaev.
Al osynyń aldynda Qazaqstan Prezidenti Nursultan Nazarbaev Qazaqstan musylmandary dini basqarmasy ókilderimen kezdesý kezinde qysqa balaq pen uzyn saqaldyń bizdiń dástúrge sai kelmeitinin aitty. Elbasy mundaiǵa zań júzinde tyiym salýdy usynǵan bolatyn.
"Dini saýatsyzdyǵynyń nátijesinde jastarymyz saqal qoiyp, shalbarynyń balaqtaryn qysqartyp tastaidy. Qara kóilek kiip, beti-aýzyn tumshalaǵan qyzdarymyzdyń qatary kóbeidi. Bul bizdiń dástúrimizge de, halqymyzǵa da jat. Buǵan zańnamalyq deńgeide tyiym salý máselesin pysyqtaý kerek. Qazaq qara kiimdi qaraly kezde ǵana kiedi", - degen edi Memleket basshysy.
Eske salaiyq, zań jobasynyń aiasynda adamnyń túr-keskinin tanýǵa kedergi bolatyn kiim kiiýge tyiym salý usynylǵan.
