QR Densaýlyq saqtaý vitse-ministri Erlan Qiiasov DDSU Eýropalyq aimaqtyq biýrosynyń basqosýyna qatysty, dep habarlaidy "Ult aqparat" ministrliktiń baspasóz qyzmetine silteme jasap.
Basqosýǵa Qazaqstan, Qyrǵyzstan, Resei, Tájikstan, Túrikmenstan jáne Ózbekstannyń densaýlyq saqtaý ministrleri qatysty. Jiynda COVID-19 pandemiiasynyń qazirgi jaǵdaiy talqylandy. COVID-19 vaktsinalaryn taratý men qamtamasyz etý, vaktsinatsiialaýdy júzege asyrý máseleleri qaraldy.
«Qazir Qazaqstanda epidemiologiialyq ahýal turaqtalyp keledi. Koronavirýs infektsiiasynyń taralýyna jol bermes úshin aldyn alý sharalary júrgizilýde. Búgingi kúni kóptegen el, sonyń ishinde Qazaqstan jańa koronavirýs infektsiiasynyń taralýyn boldyrmas úshin, COVID-19-ǵa qarsy vaktsina jasaý jumysyn belsendi túrde júrgizip jatyr», - dedi jiynda Erlan Qiiasov.
Búgingi tańda klinikalyq zertteýlerdiń III kezeńinde turǵan birneshe vaktsina bar. Qazaqstan tarapy olardy jiti baqylap otyr.
«Koronavirýsqa qarsy alǵashqy vaktsinany jasaý men tirkeýdiń sátti tájiribesin eskere otyryp, QR Densaýlyq saqtaý ministrligi men Reseidiń tikelei investitsiialar qory arasynda yntymaqtastyq týraly kelisimge qol qoiyldy. Oǵan sáikes Resei Federatsiiasy «Spýtnik V» vaktsinasyn Qazaqstan aýmaǵynda óndirýge arnalǵan tehnologiialyq transferdi, keminde 2 mln doza vaktsina óndirýge sýbstantsiia beredi. Bul másele reseilik mamandarmen egjei-tegjeili pysyqtalýda», - dedi vitse-ministr.
Osy jyldyń maýsym aiynda Jambyl oblysynda QR BǴM Ǵylym komitetiniń Biologiialyq qaýipsizdik problemalary ǴZI janynan qýaty 60 million dozaǵa deiin vaktsina óndiretin zaýyttyń qurylysy bastalǵan. Álem elderimen birge qazaqstandyq ǵalymdar da COVID-19-ǵa qarsy vaktsina ázirleýde. Ol DDSU tizimine engen, klinikalyq synaqtardan sátti ótýde.
Memleket basshysy Qasym-Jomart Toqaevtyń tapsyrmasy boiynsha halyqtyń qosymsha áleýmettik osal toptaryn qosa alǵanda, vaktsinatsiialaýǵa jatatyn azamattar kontingenti keńeitiledi. Qazirgi ýaqytta KVI-ǵa qarsy ázirlengen vaktsinalardyń erekshelikterin eskere otyryp, jospar daiyndalýda. Osy josparǵa sáikes KVI-ǵa qarsy vaktsinatsiia josparly profilaktikalyq ekpeni júrgizetin meditsinalyq uiymdardyń qoldanystaǵy ekpe kabinetteri bazasynda jasalady. Koronavirýs infektsiiasyna qarsy vaktsinatsiialaýdyń bastalǵany týraly halyqqa klinikalyq zertteýdiń barlyq kezeńderi aiaqtaoyp, vaktsinalardyń qaýipsizdigi men tiimdiligi týraly tolyq derekter naqtylanyp, vaktsinany elge jetkizgen kúnnen keiin habarlanady.
«Bul máselede halyqaralyq uiymdar – DDSU men IýNISEF tarapynan ádistemelik qoldaý kútemiz», - dedi vitse-ministr.
Kezdesý sońynda E.Qiiasov Dúniejúzilik densaýlyq saqtaý uiymynyń Eýropalyq óńirlik biýrosyna jáne COVID-19-dyń álemde taralýyna qarsy kúreste jáne ony aldyn-alýda jetekshi ról atqaryp otyrǵany úshin rizashylyǵyn bildirdi.
Eske salsaq, 22 jeltoqsannan bastap Qazaqstanda reseilik «Spýtnik V» vaktsinasy óndirile bastaidy.
Aldyn ala boljamǵa sáikes, Qazaqstanda koronavirýsqa qarsy vaktsina 65 jastan asqan, júrek-qan tamyry aýrýy, qant diabeti jáne sozylmaly ókpe aýrýlary bar táýekel tobyna kiretin adamdarǵa jáne meditsina qyzmetkerlerine salynatyn bolady. Vaktsina alatyndardyń boljamdy sany 2 347 000 adamdy quraidy.
