Foto: Freepik
Jeke tulǵalar úshin bankrottyq protsedýrasy jeńildetilýi múmkin. Bul týraly vitse-premer – qarjy ministri Erulan Jamaýbaev málimdedi, dep habarlaidy Sputnik Qazaqstan.
"Jekelegen boryshkerler keibir kedergilerdiń saldarynan bankrottyq rásimin qoldana almai otyr. Osyǵan bailanysty birqatar norma usynylady", - dedi Jamaýbaev parlamenttik tyńdaýda.
Bankrottyq protsedýrasyn ońailatý úshin usynylyp otyrǵan sharalar:
• sottan tys bankrottyqqa jatatyn qarjy uiymdarynyń tizbesin keńeitý;
• azamattardy sottan tys bankrottyq rásimin qoldaný týraly ótinishke qosymsha qujattar berýden bosatý;
• tólem qabilettiligin qalpyna keltirý rásimin qoldaný úshin negizderden ótinish berýshiniń 12 ai ishinde kreditorlar aldynda óteýdiń bolmaý faktisin rastaýdy alyp tastaý;
• tólem qabilettiligin qalpyna keltirý jospary bekitilgennen keiin boryshkerdiń shetelge shyǵýyna tyiymdy alyp tastaý.
Ministrdiń aitýynsha, biyl 3 naýryzdan bastap bankrottyq boiynsha 68 myńnan astam ótinish kelip túsken. Onyń 55 myńy bankrottyq rásimge sáikes kelmeitini anyqtaldy.
Negizgi sebepteri: múliktiń bolýy, boryshkerdiń qaryz somasy men tólem merzimi boiynsha sáikessizdik jáne kreditormen boryshty durys rettemeý.
"Nátijesinde búgingi tańda 8 mlrd teńgeden astam borysh somasyna 5,6 myńǵa jýyq azamat bankrot dep tanyldy", - dedi vitse-premer.
Sot arqyly bankrottyq jáne tólem qabilettiligin qalpyna keltirý rásimin qoldaný úshin sottarǵa 1 200-ge jýyq azamat júginip, bankrottyqqa qatysty 35 sheshim shyǵaryldy.
