Foto: batyrlargatagzym.kz
QR Mádeniet jáne aqparat ministrligi batyrlargatagzym.kz portalyn iske qosty, dep habarlaidy «Ult aqparat». Jobanyń negizgi maqsaty – ár batyrdyń tarihta laiyqty tanylýyn qamtamasyz etý.
Memleket soǵys jyldarynda teńdesi joq jaýyngerlik jáne eńbek erlikterin jasaǵan otandastarymyzdy el jadynda saqtaý boiynsha júieli jumys júrgizýde.
Sait ártúrli aqparat kózderinen jinaqtalǵan jáne Qazaqstan halqynyń erliginiń máńgilik eskertkishi bolyp tabylady. Pilottyq joba 2023 jyly iske qosylyp, azamattyq qoǵam men eriktilerdiń úlken qyzyǵýshylyǵyn týdyrdy. Saittyń fýnktsionaldyq múmkindikteri keńeitilip, derekter tolyqqandy portalǵa júielendi.
"Biz árbir qazaqstandyqty UOS ardagerleri týraly qosymsha aqparat berý arqyly bul jobaǵa óz úlesin qosýǵa shaqyramyz. Kez kelgen adam jeke otbasylyq muraǵattarda saqtalǵan qujattarmen saitty tolyqtyrýǵa kómektese alady. Bul fotosýretter, qujattar, maidannan kelgen hattar jáne basqa materialdar bolýy múmkin. Bul portal – Qazaqstan Respýblikasy Mádeniet jáne aqparat ministrliginiń, Memlekettik arhivterdiń, Qazaqstan Respýblikasy Qorǵanys ministrliginiń, eriktiler men azamattyq qoǵamnyń birlesken jumysynyń nátijesi",-delingen habarlamada.
Búgingi tańda portalda 100 myńnan astam qazaqstandyq ardagerler týraly aqparat bar. Ekinshi dúniejúzilik soǵystyń 80 jyldyǵyna orai portal barlyq ardagerler týraly derekterdi biriktiredi dep úmittenemiz.
