Parlamenti Senatynyń depýtaty Aqmaral Álnazarovanyń aitýynsha, elimizde balalar arasyndaǵy semizdik máselesi ózekti, dep habarlaidy QazAqparat.
Bul jaily ol búgin ótip jatqan «Qazaqstandaǵy balalar semizdiginiń taralýyn zertteý» konferentsiiasynda málimdedi. Atalǵan sharanyń maqsaty – balalar semizdiginiń jáne tamaqtanýynyń zertteý nátijelerin usyný, mektep jasyndaǵy balalar arasynda artyq dene salmaǵy jáne az qimyldy ómir saltynyń taralýy máselesine qoǵamnyń nazaryn aýdarý.
«2022 jyldy Memleket basshysy Qasym-Jomart Toqaev «Balalar jyly» dep jariialady. Sondyqtan biyl biz óz tarapymyzdan balalarymyzdyń densaýlyǵyn nyǵaitýǵa, ómir súrý sapasyn arttyrýǵa tiisti sharalardy qabyldaýymyz kerek. Elimizde balalar arasyndaǵy semizdik máselesi ózekti. Jalpy kúlli álemde balalardyń semizdikke shaldyǵýy beleń alyp barady. Damyǵan elderde osy teris tendentsiiaǵa tosqaýyl qoiý úshin keshendi josparlar júzege asyrylýda. Bizde de qajetti sharalar qolǵa alynýy qajet», - dedi senator.
Onyń aitýynsha, balalardyń túrli syrqattarǵa shaldyǵýy, onyń ishinde artyq salmaqqa dýshar bolýy el ekonomikasyna áser etetindigi sózsiz.
«Halyqaralyq zertteý nátijeleri kórsetkendei, semizdiktiń saldarynan 2050 jyly týǵan balalar qazirgilerge qaraǵanda az ómir súretin bolady. Semizdik – halyq óliminiń negizgi eki sebepteriniń birine ainalmaq. Sol úshin balalardy qarshadaiynan durys tamaqtandyrý – meditsina, bilim salalaryndaǵy basty mindet bolýy tiis», - dedi Aqmaral Álnazarova.
