2020 jyldyń 8 aiynda elimizde 1 733 avtokólik urlanyp, onyń 233-i ǵana tabylǵan. Mundai derekti QR Premer-Ministriniń orynbasary Roman Skliardyń atyna saýal joldaǵan Májilis depýtaty Ersultan Bekturǵanov keltirdi, dep habarlaidy "Ult aqparat".
«Sizdiń atyńyzǵa saýal joldaýymyz, kólik urlyǵynan jábir shekken azamattarymyzdyń ótinishteri sebep bolyp otyr. QR Ishki ister ministrligi usynǵan málimetine sáikes sońǵy 2 jyl jáne 2020 jyldyń 8 aiy ishinde 5 132 kólik urlanyp, onyń ishinde tek qana 1 922 kólik ielerine qaitaryldy. Jalpy, kimniń bolsa da avtokóliginiń joǵalýy jáne onyń tabylmai ketýi, jábirlengen januia úshin aýyr tietini belgili. Statistikaǵa qaraǵanda 2019 jyly 1 490 avtokólik urlanyp, onyń 671-i ǵana tabylǵan. Al osy jyldyń 8 aiynda 1 733 avtokólik urlanyp, 233 ǵana tabylyp otyr», - dedi depýtat.
Onyń atap ótýinshe, mundai kórsetkishke sebepterdiń biri avtokólik quraldaryn ekinshi rettik esepke alý nemese sheshý kezinde avtokóliktiń shanaǵy men qozǵaltqyshynyń nómirlik belgilerin vizýaldy tekserý júrgizýdi alyp tastaý boldy. Sońǵy 2 jyl jáne 2020 jyldyń 8 aiy ishinde eki rettik sanaqqa qoiylǵan kólikterdiń sany 2 325 820 quraǵan.
Osyǵan orai depýtat shanaqtyń jáne qozǵaltqyshtyń nómerlik belgileriniń túpnusqalyǵy bóliginde jáne kólikti ekinshi rettik qaita tirkeý kezinde sáikestigin tekserýdi qaita iske asyrý múmkindigin qarastyrýdy surap otyr.
