Qazaqstanda qandai ózenderdiń arnasyn qalyń shóp pen batpaq basý qaýpi bar? Bul suraqqa QR Tsifrlyq damý, qorǵanys jáne aeroǵarysh ónerkásibi ministrligi aeroǵarysh komitetiniń tóraǵasy Baýbek Oralmaǵambetov jaýap berdi, dep habarlaidy QazAqparat.
«Biz memlekettik organdardyń tapsyrysymen elimizdegi sý qoimalarynyń rejimi men ózen-kólderge ǵaryshtyq monitoring arqyly baqylaý júrgizemiz. Sondai-aq, aýyl sharýashylyǵy jáne mal jaiylymy úshin qoldanylatyn sý qoimalary da qadaǵalanady. Odan bólek, ǵaryshtyq monitoring arqyly sý tasqynyn boljaý jáne aldyn alýdyń da múmkindigi bar. Boljamdy biz Qazgidromet usynǵan derekterdiń negizinde ǵaryshtyq túsirilim arqyly jasaimyz. Sý tasqyny boiynsha boljamdy synaq Ertis ózinene júrgizildi», - dedi Baýbek Oralmaǵambetov OKQ-de ótken baspasóz máslihatynda.
Sondai-aq, spiker elimizde ózender arnasynyń batpaqtanýy men qalyń shóptiń qaptaýy boiynsha da ǵaryshtyq monitoring júrgizilgenin aitty.
«2020-2021 jylǵy ǵaryshtyq monitoring deregi boiynsha Ile, Jaiyq, Syrdariia, Ertis, Esil, Shilik, Nura, Sarysý, Tobyl, Aqsý, Asa jáne Shý ózeni arnasynda qalyń shóp ósken 2 myń gektar jer anyqtaldy. Sondai-aq, atalǵan ózenderdiń 47,7 myń gektar aýmaq jer batpaq basqan. Óz kezegimizde bul aqparatty tiisti shara qabyldaý úshin quzyrly organdarǵa jiberdik», - deidi ol.
