«Samruk-Kazyna Trust» áleýmettik jobalardy damytý qory áleýmettik mańyzdy 500 jobany júzege asyrdy. Bul týraly qordyń korporativtik qyzmetiniń jetekshisi Miras Irgebaev Donorlar forýmynda aityp berdi, dep habarlaidy QazAqparat.
«Samruk-Kazyna Trust» qory 10 jylǵa jýyq ýaqyt boiy jumys istep keledi jáne áleýmettik mańyzy bar jobalardy jasaýda mol tájiribesi bar. Osy 10 jylda áleýmettik mańyzy bar 500 jobany júzege asyra aldyq, 1,5 millionnan astam adam kómek aldy. Qorymyz birizdilik, tiimdilik jáne áleýmettik mańyz qaǵidattaryna negizdelip jumys isteidi. Biz úshin qandai da bir máseleniń júieli túrde sheshilýi óte mańyzdy. Oǵan qosa, óz qyzmetimizde birrettik qaiyrymdylyqtan bas tarttyq. Biz árdaiym belgili bir máselelerdi sheshý kezinde bolashaqta bul problemanyń yqpalyn azaitý úshin onyń sebepterin tolyqqandy zertteimiz», - dedi M. Irgebaev «Qazmedia» ortalyǵynda ótken Donorlar forýmynda.
Spikerdiń pikirinshe, karantin jaǵdaiyndaǵy jumys donorlyq praktikaǵa jańa quraldardy engizýge yqpal etedi.
Qor biyl da koronavirýs pandemiiasyna qaramastan óz jobalaryn jalǵastyryp keledi. Karantinde jumystyń kóp bóligi onlain júrip jatyr. Osylaisha, «Zamandas» balalar aýla klýbtarymen yntymaqtastyq jalǵasýda, onda halyqtyń áleýmettik osal toptarynan shyqqan balalar qosymsha bilim alady. Al «Deni saý balalar» jobasynda tserebraldy sal aýrýy diagnozy bar balalarǵa konsýltatsiialar onlain-formatta kórsetilip jatyr.
«Sonymen birge, «Samruk-Kazyna Trust» qory Tuńǵysh Prezident Qorymen birlesip BTsP diagnozy bar balalarǵa arnalǵan 8 ońaltý ortalyǵyn jáne 6 psihologiialyq túzetý kabinetin qurý jobasyn iske asyrýda», - deidi M. Irgebaev.
Aita keteiik, forýmdy QR Aqparat jáne qoǵamdyq damý ministrliginiń qoldaýymen Azamattyq bastamalardy qoldaý ortalyǵy uiymdastyrǵan. Forým qorytyndysy boiynsha Qazaqstannyń IX Azamattyq forýmynyń qarar jobasyna usynystar men usynymdar ázirlenedi.
