Qazir Qazaqstanda 2 qant zaýyty turaqty jumys istep tur, mamyr aiynda taǵy bireýi iske qosylady. Osylaisha, ishki naryq tolyq qamtylady. Bul týraly QR Aýyl sharýashylyǵy ministrligi agrarlyq azyq-túlik naryqtary jáne aýyl sharýashylyǵy ónimin qaita óńdeý departamentiniń direktory Nazgúl Hatepova málim etti, dep habarlaidy QazAqparat.
«Búginde elimizde 30 myń tonna qant qory bar. Bul - óndirýshi zaýyttardaǵy qant kólemin eseptemegende. Qazirgi ýaqytta Taraz jáne Kóksý qant zaýyty turaqty jumys istep tur. Odan bólek, mamyr aiynda Merke qant zaýyty iske qosylady dep otyrmyz. Osylaisha, 3 óndiris orny ishki naryqty qantpen tolyq qamtidy», - dedi Nazgúl Hatepova ortalyq kommýnikatsiialar qyzmeti alańynda bolǵan baspasóz máslihatynda.
Ministrlik ókili keltirgen statistikaǵa sáikes, elimizdiń jyl saiynǵy qant tutyný qajettiligi - 530 myń tonna.
«Onyń ishinde 380 myń tonna importqa tiesili. Elimizge ónimniń 85 paiyzdan astamy Reseiden keledi. Atalǵan eldiń qantty eksporttaýǵa shekteý qoiýy, bizdiń naryqqa áserin tigizdi. Degenmen, biz buǵan deiin de aitqanbyz, Qazaqstanda qant tapshylyǵy joq. Sonymen qatar, bizdiń ministrlik Eýropalyq ekonomikalyq komissiiamen birlesip, elimizge syrttan qantty baj alymynsyz jetkizýge qosymsha kvota bólý máselesin qarastyryp jatyr», - deidi ol.
Málimdeýinshe, EEK-pen másele sheshilgen jaǵdaida, elimizge syrttan 300 myń tonna qant baj alymynsyz jetkiziledi.
