Búgin Úkimet otyrysynda QR Saýda jáne integratsiia ministri Baqyt Sultanov azyq-túlik baǵasyn turaqtandyrý joldary atady, dep habarlaidy "Ult aqparat".
«Áleýmettik mańyzy bar azyq-túlik taýarlary baǵalaryn tiimdi qalyptastyrý ministrliktiń turaqty baqylaýynda. Ótken jylǵy 11 paiyzdyq ósim importqa táýeldi jáne eksportqa baǵdarlanǵan negizgi 5 taýarǵa bailanysty boldy. Olardyń úlesi 8,9 paiyzdy qurady. Baǵany túbegeili turaqtandyrý úshin Ministrlik birqatar keshendi sharalardy usynady. Birinshiden, ákimdikter bul máseleni qatań baqylaýda ustaýy qajet. Taýarlardyń baǵalary ósýi kezinde shekti baǵalardy engizý boiynsha dereý sharalardy qabyldaý; importqa táýeldi jáne eksportqa baǵdarlanǵan taýarlar boiynsha turaqtandyrý qorlaryn tolyqtai qalyptastyrý; ózimizde óndiriletin taýarlar boiynsha qarjylandyrý kólemin 50 mlrd teńgege deiin ulǵaita otyryp, «ainalym shemasy» aiasynda forvardtyq kelisimsharttardy basym túrde qarjylandyrýdy qamtamasyz etý kerek»,- dedi ol.
Ekinshiden, ministr aýyl sharýashylyǵy taýarlarynyń óndirisin ulǵaitý qajettigine nazar aýdartty.
«Úshinshiden - saýdany tsifrlandyrýmen qatar, Ulttyq taýar ótkizý júiesin iske asyrý. Jalpy, 24 kóterme-taratý ortalyǵy salynady. Onyń ishinde 2022 jyly Nur-Sultan, Shymkent, Almaty qalalarynda, jáne Almaty, Jambyl, Pavlodar oblystarynda 7 kóterme-taratý ortalyǵy iske qosylady. Sonymen birge V2V platformasy engizilip, áleýmettik ámiianmen integratsiialanatyn bolady», - dedi Baqyt Sultanov.
