Elimizde 187 million gektar jaiylym jerdiń 100 milliony osy kúnge deiin ainalymǵa enbei, dástúrli mal sharýashylyǵyn damytýǵa tolyqqandy úlesin qospai keledi. Bul týraly búgin Májiliste «Jaiylymdar týraly» zań jobasyn talqylaý barysynda depýtat Jeksenbai Dúisebaev aitty, dep habarlaidy "Ult aqparat" Baq.kz portalyna silteme jasap.
«Halqymyzdyń 45 paiyzdan astamyn qurap otyrǵan aýyl turǵyndaryn kópten beri mal sharýashylyǵyn damytýdaǵy eń basty tabiǵi bailyǵymyz bolyp tabylatyn 187 mln gektar jaiylymdyq alqaptyń osy kúnge deiin oryndy túrde uqypty paidalanylmai, óz nátijesin bermei, túbegeili sheshilmei otyrǵandyǵy alańdatyp otyr», - deidi J.Dúisebaev.
Depýtattyń sózinshe, qazirgi tańda aýyl sharýashylyǵyna tiesili jer resýrstarynyń 70 paiyzy mal baǵatyn jerdiń úlesinde. Iaǵni, bir maldyń basyna shaqqanda 20 gektar jer kólemi bar. Bul degenimiz, bolashaqta indýstriialdy-innovatsiialyq damyǵan, aldyńǵy qatardaǵy agrarlyq memleket bolýǵa bizdiń tolyq múmkindigimiz bar.
«Is júzinde keń baitaq jerimizdiń 43 paiyzy nemese 80 mln gektar jer ǵana qoldanystaǵy jaiylymdarǵa tiesili bolyp otyr. Iaǵni, mal basyna shaqqanda orta eseppen 2-3 gektardan aspaidy. Keibir aimaqtarda budan da kem. Norma boiynsha 5 gektardan az bolmaýy tiis. Saldarynan 27 mln gektar jaiylymdyq jer degradatsiiaǵa ushyrap, bul kólem jyldan-jylǵa ulǵaiyp barady», - dedi ol.
Osyndai jaǵdaidyń qalyptasýynyń basty sebepterine toqtalsaq, birinshiden, 100 mln gektar jaiylymdyq alqap osy kúnge deiin ainalymǵa enbei, dástúrli mal sharýashylyǵyn damytýǵa tolyqqandy úlesin qospai keledi. Ekinshiden, aýyldyq tórt túlik maldyń basym kópshiligi nemese 70 paiyzy tek qana aýyl mańyna jaqyn jerlerde shoǵyrlanǵan. Úshinshiden, shalǵaidaǵy jaiylymdardy sýlandyrý máselesi tolyǵymen sheshilmegen, infraqurylym obektileri damymaǵan. Tórtinshiden, mal basynyń basym bóligi usaq jáne qosalqy sharýashylyqtarda bolǵandyqtan, mal ieleriniń ekonomikalyq faktorlarǵa bailanysty maldaryn shalǵaidaǵy jerlerge jaiýǵa múmkindigi joq. Besinshiden, aýyldyq okrýgterdiń qaraýyndaǵy, iaǵni aktsionerlik qoǵamdarǵa, jaýapkershiligi shekteýli seriktestikterge, sharýashylyq qojalyqtaryna, orman, sý sharýashylyqtaryna tiesili keibir jaiylymdyq jerler zań júzinde rettelmegendikten, bul jerler tolyq ainalymǵa engizilmei, nátijesin bermei otyr», - dedi depýtat.
Aita keteiik, «Jaiylymdar týraly» zań jobasyn Májilis depýtattary ózderi ázirlegen.
