Semeide ótken «Elimai» — «Ordabasy» matchynan keiin qazaqstandyq fýtbolda úlken daý tutandy. Kezdesýdiń bas tóreshisi Arman Esmuratovty Semeiden oralǵan boida elorda áýejaiynda politsiia qyzmetkerleri qarsy alǵany týraly aqparat paida boldy, dep habarlaidy ult.kz.
Derekkózderdiń málimetinshe, referige naqty qandai aiyp taǵylatyny ázirge belgisiz. Janjaldyń ýshyǵýyna tóreshiniń alań ieleri men komandanyń bas bapkerine qarata balaǵat sózder aityp, chempionat sońyna deiin klýbqa «qiyn ómir» syilaitynyn aityp qoqan-loqy kórsetkeni sebep bolýy múmkin. Tóreshiniń beiádep sózder qoldanǵan videosy áleýmettik jelilerde tez tarap ketti.
Janjal neden bastaldy?
Esmuratovtyń sheshimderine narazylyq oiynnyń 39-minýtynda, ol «Elimaidyń» golyn eseptemegen sátte bastaldy. 46-minýtta bul jaǵdai qaitalandy, biraq bul joly VAR júiesindegi áriptesteri ofsaidtyń bolǵanyn rastady.
Naǵyz teketires finaldyq ysqyryqtan keiin oryn aldy. Tóreshige jaqyndap, narazylyq bildirgen «Elimaidyń» bas bapkeri Andrei Karpovich pen jartylai qorǵaýshy Jan-Áli Pairýz qyzyl qaǵaz alyp, kelesi matchtan shettetildi.
Andrei Karpovich, «Elimai» FK bas bapkeri:
«Ol meni balaǵattap, aýyr sózder aitty. Óz áreketimen bizdiń búkil oblysymyzdy, jankúierlerimizdi qorlady. Onyń ústine, chempionattyń qalǵan bóliginde «Elimaidy» tuqyrtyp, meniń kúlimdi kókke ushyratynyn aitty. Biraq baiqasyn, óziniń de kúli kókke ushýy múmkin. Bas tóreshi tarapynan mundai málimdemelerdi estý men úshin naǵyz jabaiylyq».
Jankúierler úni jáne ákimniń reaktsiiasy
Osy oqiǵadan keiin klýb jankúierleri Abai oblysynyń ákimi Berik Ýálige resmi úndeý joldap, jaǵdaidy jeke baqylaýyna alýdy jáne tóreshiler brigadasynyń áreketin obektivti túrde qarastyrýdy suraǵan bolatyn.
Óńir basshysy bul máselege jedel ún qatyp, óziniń áleýmettik jelidegi paraqshasynda málimdeme jasady. Ol jankúierlerdiń aryz-ótinishteri nazardan tys qalmaitynyn jáne Qazaqstan fýtbol federatsiiasynyń (QFF) basshylyǵymen sóileskenin jetkizdi.
Berik Ýáli, Abai oblysynyń ákimi:
«Kesheden beri jergilikti «Elimai» fýtbol klýbynyń jankúierlerinen kóptegen aryz-ótinishter kelip túsip jatyr. Kóterilgen máselelerdiń mán-jaiyn jan-jaqty zerdelep, ádildik pen ashyqtyq qaǵidattarynyń saqtalýy úshin tiisti jumystar júrgizemiz.
Osy máselege bailanysty Qazaqstan fýtbol federatsiiasynyń prezidenti Marat Omarovpen sóilestim. Federatsiia basshysy barlyq jaittyń muqiiat qaralatynyn, arnaiy komissiia qurylyp, másele sońyna deiin jetkiziletinin málimdedi. Ádilettilik jolyndaǵy ustanymymyz ózgermeidi. Bul máseleni baqylaýda ustaimyz».
Tóreshiniń alǵashqy «erligi» emes
HALYQSTAN tilshisi anyqtaǵandai, Arman Esmuratov buǵan deiin de osyndai daýdyń ortasynda qalǵan. Bes jyl buryn «Atyraý» — «Shahtór» matchynan keiin ol tribýna astyndaǵy bólmede alań ieleriniń oiynshysy Sabit Tastanbekovpen janjaldasyp, ony keýdesinen urǵan bolatyn.
Sol kezde Federatsiia janjaldy fýtbolshynyń ózi bastaǵanyn alǵa tartsa da, Esmuratovty maýsymnyń sońyna deiin tórelik etýden shettetken edi.
Endigi kezekte arnaiy qurylatyn komissiia men fýtbol biliginiń bul joly qandai qatal shara qoldanaryn ýaqyt kórsetedi.
