Almaty oblysynda memleketaralyq izdeý jariialanǵan erli-zaiypty ustalyp, qamaýǵa alyndy. Olarǵa qarjy piramidasyn qurdy jáne eki myńnan astam qazaqstandyqty aldady degen aiyp taǵyldy, - dep habarlaidy Tengrinews.kz tilshisi Qarjy monitoring agenttiginiń baspasóz qyzmetine silteme jasap.
Vedomstvo qarjy piramidasy dep tanylǵan turǵyn úi-qurylys kooperativin uiymdastyrýshy erli-zaiypty ustalǵanyn rastady. Olarǵa qatysty qamaýǵa alý túrindegi bultartpaý sharasy tańdaldy.
"2019 jyldyń qarashasynan 2021 jyldyń qarashasyna deiin elimizdiń 12 aimaǵynan eki myń salymshydan paiyzsyz qaryz berý arqyly jyljymaityn múlikti satyp alýǵa járdemdesý úshin 1,3 milliard teńge alǵany anyqtaldy", - delingen habarlamada.
AFM kooperativ quryltaishylarynyń jasalǵan qylmysqa esh qatysy joqtyǵy, olar quryltaishylyq jáne basqa da qujattarǵa eshqashan qol qoimaǵanyn aitty. Sonymen qatar, tutyný kooperativi óz qyzmetin qoldanystaǵy zańnamany buzyp júrgizgeni aityldy.
Qarjy piramidasyn uiymdastyrýshylardy qylmystyq jaýapkershilikke tartý týraly 350-den asa azamat ótinish bildirgeni habarlandy.
Sottyń sanktsiiasymen atalǵan kooperativtiń esep aiyrysý shottaryndaǵy jyljymaityn múlikteri, qarajattary tárkilendi.
Shymkent, Aqtóbe, Batys Qazaqstan, Qaraǵandy jáne Túrkistan oblystary boiynsha departamentter de osy óńirlerdegi qarjylyq piramidany basqarý deregi boiynsha sotqa deiingi tergeýdi bastaǵany atap ótildi.
AFM qarjy piramidasynyń qurbandary áldeqaida kóp bolýy múmkin ekenin eskerip, eger "Elim-ai" tutyný kooperativine múshe tanystaryńyz bolsa, myna telefonǵa habarlasýdy surady: +7 (7172) 708-478.
