Foto: QR MAM
Qazaq jýrnalistikasy men poeziiasynda ózindik orny bar qalamger, Qazaqstan Jazýshylar jáne Jýrnalister odaǵynyń múshesi Murat Myrqanuly Tastaǵanov dúnieden ótti. Bul týraly aqparatty Mádeniet jáne aqparat ministrligi habarlady.
Murat Myrqanuly 1953 jyly Shyǵys Qazaqstan oblysy Kúrshim aýdanynyń Saryqamys qystaǵynda dúniege kelgen. Ál-Farabi atyndaǵy Qazaq ulttyq ýniversitetiniń jýrnalistika fakýltetin támamdap, eńbek jolyn «Kommýnizm týy» (qazirgi «Didar») gazetinde bastaǵan. Keiin óńirlik baspasózde uzaq jyldar qyzmet atqaryp, qazaq jýrnalistikasynyń damýyna aitarlyqtai úles qosty.
Ol poeziia salasynda da aishyqty iz qaldyrdy. «Máńgi jas ǵumyr», «Marqakólim – móp-móldirim, mereiim», «Altyn taý – Altai» atty jyr jinaqtarynyń avtory atanyp, elge rýh pen syrǵa toly týyndylar syilady. Sondai-aq 60-tan astam ánniń sózin jazyp, qazaq estradasyna da óz únin qosty.
Murat Tastaǵanov Kúrshim aýdanynyń Qurmetti azamaty atanyp, týǵan óńiriniń rýhani ómirin órkendetýge airyqsha eńbek sińirdi. Ana tili men ulttyq rýhtyń janashyry bolǵan ol «Qazaq tili» qoǵamynyń Óskemen qalalyq uiymyn basqaryp, tildiń qadir-qasietin dáripteýge ómirin arnady. Keiin oblystyq tele-radiokompaniiada, Semeidegi «Ertis óńiri» gazetinde jáne Ámire Qashaýbaev atyndaǵy filarmoniiada eńbek etip, mádeniet pen ónerdiń damýyna zor úles qosty.
Qalamgerdiń ótkir oily maqalalary men el rýhaniiatyn baiytqan shyǵarmalary halyq jadynda máńgi saqtalady. Ultyna adal qyzmet etken abzal azamattyń rýhy peiishte shalqyp, imany joldas bolǵai.
