Qazaqstan shetel azamattaryna arnalǵan kóshi-qon qyzmetterin tsifrlandyrýdy jańa deńgeige shyǵarýǵa kiristi. Úkimet otyrysynda Ishki ister ministri Erjan Sádenov sheteldikterge JSN rásimdeý endi burynǵydai kúrdeli rásim emes, mobildi qosymsha arqyly qoljetimdi bolatynyn málimdedi, dep habarlaidy ult.kz.
Buǵan deiin shetel azamattary úshin JSN alý kóbine ýaqyt pen qujat ainalymyn talap etetin rásim bolsa, endi bul protsess tsifrlyq formatqa kóshirilmek. Jańa QazETA mobildi qosymshasy arqyly sheteldikter kóshi-qon qyzmetterin onlain túrde alyp, sonyń ishinde jeke sáikestendirý nómirin rásimdei alady.
Iaǵni Qazaqstan shekarasynan ótken sátten bastap-aq shetel azamaty úshin aqparattyq jáne ákimshilik qyzmetter bir júiege biriktirilýi kózdelip otyr. Áýejailar men iri shekara beketterinde beriletin QR-kody bar týristik kartalar da osy tsifrlyq ekojúieniń bir bóligine ainalǵan. Onda elde bolý erejeleri, jedel qyzmetter men bailanys operatorlary týraly málimet qamtylǵan.
Bul qadamnyń astarynda tek qyzmetti jeńildetý emes, elge keletin shetel azamattarynyń esebin naqtylaý, kóshi-qon protsesterin tolyq tsifrlyq baqylaýǵa kóshirý maqsaty da bar.
Alaida júieniń tolyq iske qosylýy úshin zańnamalyq ózgerister qajet. Qazir Senat tiisti túzetýlerdi qarap jatyr. Sonymen qatar 2026 jyldan bastap sheteldegi Qazaqstan elshilikteri men konsýldyqtarynda JSN berý tájiribesi toqtaidy degen jospar da bar.
Bul ózgerister bir jaǵynan biýrokratiiany azaityp, qyzmetti jedeldetýge baǵyttalsa, ekinshi jaǵynan memleket úshin tsifrlyq baqylaý men qaýipsizdik mehanizmderin kúsheitýdiń jańa kezeńin bildiredi.
