Mádeniet jáne sport ministri Aqtoty Raiymqulova sport klýbtarynyń qarajatyn qaita bólýdiń biryńǵai tásilderi engiziletinin málim etti, dep habarlaidy QazAqparat.
«Máselen 2019-2020 jyldary elimizdiń 17 óńirinde jergilikti biýdjetterden 252,6 mlrd teńge bólinip, eleýli nátijelerdiń bolmaýyna qaramastan qarajattyń kóp bóligi fýtbol jáne hokkei klýbtaryn ustaýǵa jumsaý jalǵasýda. Osylaisha, 2019 jyly jalpy 121,3 mlrd teńge bólinip, onyń ishinde fýtbolǵa 34,1 mlrd teńge (28,1%), al 2020 jyly 131,3 mlrd teńge bólinip, onyń ishinde fýtbolǵa – 37 mlrd teńge (28,2%) jumsaldy. Óz kezeginde Mádeniet jáne sport ministrligi barlyq respýblikalyq oiyn federatsiialarymen (fýtbol, hokkei, gandbol, voleibol, basketbol, regbi, kógaldaǵy hokkei jáne t.b.) keńes ótkizdi. Keńes barysynda joǵaryda atalǵan klýbtardyń qarajatyn qaita bólýdiń biryńǵai tásilderi talqylandy. Klýbtar sportshylardy ustaýǵa óz biýdjetiniń 50%-na deiin qarajat jumsaityndyqtan Federatsiiadan sportshylardyń jalaqysyn retteý boiynsha usynystar kelip tústi», - dedi Aqtoty Raiymqulova OKQ-da ótken baspasóz máslihatynda.
Ministrdiń aitýynsha 5 qazannan bastap Mádeniet jáne sport ministrligi kásiptik sport klýbtaryn ustaýǵa baǵyttalatyn qarjyny qaita qaraý máselesi boiynsha jergilikti atqarýshy organdarmen tyńdaý ótkizilýde.
«Búgingi kúni ministrlik sportshylarǵa, jattyqtyrýshylarǵa jáne klýb jetekshilerine jalaqy tólemderin zańdy deńgeide retteý bóligi boiynsha Májiliste qaralýda jatqan zań jobasyna túzetýler ázirledi. Bul másele QR Májilisiniń jumys tobynyń otyrysynda qaralyp, depýtattar tarapynan qoldaý tapty. Balalardyń sporttyq jáne shyǵarmashylyq áleýetin damytý úshin jaǵdai jasaý maqsatynda barlyq oblysta, respýblikalyq mańyzy bar qalada jáne astanada, iri aýdan ortalyqtarynda sport sektsiialaryn ashý jáne «balalar úiirmeleriniń» qyzmetin qalpyna keltirý boiynsha jumys júrgizilýde», - dedi ol.
