Qazaqstannyń birinshi, álemniń 16-raketkasy Elena Rybakina Rolan Garros týrniriniń úshinshi ainalymyna shyqty, dep habarlaidy QazAqparat.
Frantsiia ashyq chempionatynyń 16-raketkasy bolyp tirkelgen qazaqstandyq tennisshi ekinshi ainalymda dúniejúzilik reitingte 135-orynda turǵan 20 jastaǵy amerikalyq Keti Volynetspen sheberlik baiqasty.
Bul olardyń ózara birinshi kezdesýi edi.
Birinshi partiia sońyna taman Rybakina breik jasap, tarazy basyn ózine aýdara bildi – 6:4.
Ekinshi sette qarqynyn tipti údetip, qarsylasyna birde-bir geim bergen joq – 6:0.
Bir saǵattan astam ýaqytqa sozylǵan báseke barysynda qazaqstandyq sportshy 2 eispen birge 11 breik-pointtyń tórteýin paidalandy.
Ótken jyly Rolan Garros jarysynyń shirek finalyna deiin jetken Rybakina úshinshi ainalymda álemniń 22-raketkasy, amerikalyq Medison Kiz nemese reitingte 79-satydaǵy frantsiialyq Karolin Garsiianyń bireýimen kezdesedi.
Qazaqstannyń juptyq syndaǵy birinshi, álemniń 20-raketkasy Anna Danilina Frantsiia ashyq chempionatyn jeńispen bastady. Ol braziliialyq Beatris Haddad Maiiamen birge 1 saǵat 52 minýtqa sozylǵan tartysty matchta japoniialyqtar Eri Hodzými – Makoto Ninomiiany 4:6, 6:4, 6:4 esebimen tize búktirdi.
Danilina men Maiia ekinshi ainalymda taibeilik Latisha Chan – aýstraliialyq Samanta Stosýrdy synap kóredi.
Qazaqstannyń erler arasynda birinshi, álemniń 42-raketkasy Aleksandr Býblik jekelei synda jarys jolynan shyǵyp qaldy. Ol ekinshi ainalymda álemniń 31-raketkasy, serbiialyq Miomir Ketsmanovichpen oinady. Osyǵan deiin eki kezdesýde qarsylastar bir-birden jeńiske jetken edi.
Bul joly Býblik matchty sátti bastady – 6:4. Alaida qalǵan úsh set Ketsmanovichtiń enshisinde ketti – 7:5, 6:2, 6:1. Eki saǵat 15 minýtqa sozylǵan matchta A.Býblik 14 eis jasap, 7 breik-pointtyń tórteýin qur jibergen joq. Ketsmanovich 4 eis, 10 breikpen kózge tústi.
Qazaqstannyń juptyq syndaǵy birinshi, álemniń 21-raketkasy Andrei Golýbev ekinshi ainalymnan asa almady. Ol frantsiialyq Fabris Martenmen birge dodanyń 16-raketkalary, úndistandyq Rohan Bopanna – niderlandylyq Matve Middelkopqa jol berdi – 3:6, 4:6.
