Elektrondyq formattyń nátijesinde biýdjet qarjysynan 8,4 milliard teńge únemdeldi. Bul týraly Qazaqstan Respýblikasy Parlamenti Májilisiniń depýtaty Baqytbek Smaǵul AntikorLive baǵdarlamasynda aitty, dep habarlaidy QazAqparat.
«Sybailas jemqorlyq jahandyq deńgeidegi másele. Ony túbegeili jeńgen memleket joq dep aitýǵa bolady, biraq solai eken dep oǵan nemquraily qarap, moiynsunýǵa bolmaidy. Jemqor sheneýniń Otanyn da, otaýyn da, memleketin de satyp ketedi. Ainalyp kelgende táýelsizdikten aiyrady», - deidi QR Parlamenti Májilisiniń depýtaty Baqytbek Smaǵul.
Onyń aitýynsha, biyl 23 qańtarda «Transperensi Interneshnl» halyqaralyq qoǵamdyq uiymy sybailas jemqorlyqty túisiný indeksiniń reitingisin jariialady.
«Nátije boiynsha, jemqorlyqpen kúreste Qazaqstan Ortalyq Aziia boiynsha kóshbasshy el bolyp tur. Reiting boiynsha 113-orynda tur. TMD memleketteri keńistigindegi biraz memleketten ozyp tursaq ta, bizdiń aldymyzda ózge memleketter bar. Biz damyǵan memleketter qataryna enemiz dep umtylyp otyrǵan bolsaq, jemqorlyqpen kúresti óristete túsýimiz kerek. Bul úshin birqatar sharalar atqarý kerek. Mysaly, biýdjettiń ashyqtyǵyn qamtamasyz etýimiz kerek. Sybailas jemqorlyqqa qarsy is-qimyl agenttigi qurylǵaly kóp nárseniń beti ashylyp jatyr. 2019 jylǵy biýdjettiń atqarylýy týraly esepke nazar aýdarǵan kezde tiimsiz paidalanylǵan qarjynyń sál-pál bolsyn azaiǵanyna kóz jetkizdik. Parlamentte de aýdit jáne qarjylyq baqylaý týraly zań qabyldanyp, byltyr kúshine endi. Sondai-aq, elektrondyq formatqa kóshýimiz kerek. Osy formattyń arqasynda biýdjet qarjysynan 8,4 milliard teńge únemdelgen», - deidi ol.
