Ishki ister ministrliginiń Tergeý departamenti Almaty qalalyq prokýratýrasynyń qadaǵalaýymen alaiaqtyq boiynsha tergelip jatqan qylmystyq is sheńberinde «Wall Street Invest Partners» JShS bas direktory M.Núsipbekovti ustady, dep habarlaidy "Ult aqparat" QR IIM-niń Polisia.kz saityna silteme jasap.
«TeleTrade Central Asia» JShS men «Wall Street Invest Partners» JShS basshylary óńirlerde filialdar ashyp, menedjerlerdi jaldaǵan. Elektrondyq birjada zor paidaǵa keneltetinin ýáde etip, klientterdi tartqan. Keiin olardyń aqshasyn offshordaǵy óz shottaryna aýdaryp, jiǵan somany jymqyryp otyrǵan. Atalmysh kompaniialar óz jumysyn sheteldik Tele Trade D.J. LTD kompaniiasymen jasalǵan kelisimshartpen búrkemelep júrgizgen. Bul kompaniiany tirkegen uiymdastyrýshylardyń ózderi. Ol Qazaqstan men Resei azamattarynyń atyna jazylǵan. Sonymen birge sheteldik bankterden shot ashylǵan.
Aita keterligi, budan buryn qylmystyq shemanyń uiymdastyrýshysy ári basshysy – «TeleTrade Central Asia» JShS basshysy B.Espolov ustalyp, sot sanktsiiasymen qamaýǵa alynǵan edi.
«TeleTrade qylmysynyń reseilik qatysýshylaryna qatysty sol eldiń quqyq qorǵaýshylary tergeý júrgizip jatyr.
TeleTrade Central Asia basshysy ustalatyn kúni Nur-Sultan, Almaty, Shymkent qalalary men Aqtóbe, Qaraǵandy men Mańǵystaý oblysyndaǵy filial keńselerine tergeýshiler tintý júrgizip, qylmysqa qatysty qujattardy tárkiledi.
Qazirgi tańda atalǵan kompaniialardyń basshylaryn qylmystyq jaýapkershilikke tartý týraly jábirlenýshilerden aryz túsýde. IIM óz tarapynan «TeleTrade Central Asia» JShS, «Wall Street Invest Partners» JShS men «TeleTrade D.J. LTD» JShS qylmystyq isinen zardap shekken basqa da azamattardy IIM-niń Tergeý departamentine júginýdi suraidy», - delingen aqparatta.
Eske sala keteiik 22 mamyr kúni Almatyda IIM-niń Tergeý departamenti alaiaqtyq faktisi boiynsha «TeleTrade Central Asya» JShS basshysyn ustap, ýaqytsha oqshaýlaǵyshqa qamaǵan edi.
