Osy jyldyń sońyna qarai Digital ID tehnologiiasy negizinde jolaýshylardyń jeke basyn biometriialyq sáikestendirý júiesin synaqtan ótkizý josparlanyp otyr. Bul týraly Antikor Live baǵdarlamasynda «Adal jol» jobalyq keńsesiniń jetekshisi Islambek Maishekin aitty, dep habarlaidy "Ult aqparat".
Sybailas jemqorlyqqa qarsy is-qimyl agenttigi bastamashylyq etken «Adal jol» jobasy aiasynda «Qazaqstan temir joly» UK» AQ-da temir jol biletterin zańsyz satyp alýshylardy joiýǵa baǵyttalǵan jumys júrgizildi.
«Poiyz biletterin «alypsatarlardy» zańsyz tabys kózinen aiyrý – jobanyń negizgi maqsaty men mindeti. Búgingi tańda kóptegen biznes-úderister ózgertilip, biletterdi satyp alý/satý baǵdarlamasy jańartyldy. Osylaisha, jańa baǵdarlamada josyqsyz paidalanýshylardy buǵattaý tetikteri kózdelgen jáne elektrondyq «kútý paraǵy» nemese elektrondyq kezek engizilgen», - deidi «Adal jol» jobalyq keńsesiniń jetekshisi Islambek Maishekin.
Onyń aitýynsha, jańashyldyqtar buryn ońai qoldan jasalatyn qaǵaz biletterden alshaqtap, azamattar basyp shyǵarmai-aq mobildi qurylǵylarda kórsete alatyn elektrondy biletterge kóshýge múmkindik berdi.
«Nátijesinde, qymbat blankiler men jabdyqtardan bas tartý 1,5 mlrd teńgeni únemdeýge múmkindik berdi. Qabyldanǵan sharalar alypsatarlar máselesin joiýǵa jáne temir jol biletteriniń jasandy tapshylyǵyn ishinara sheshýge múmkindik berdi.
«Adal jol» jobasy aiasynda osy jyldyń sońyna qarai Digital ID tehnologiiasy negizinde jolaýshylardyń jeke basyn biometriialyq sáikestendirý júiesin synaqtan ótkizý josparlanyp otyr. Jolaýshylardyń barlyq derekteri tsifrlandyrylyp, sáikestendirý adamnyń áserinsiz arnaiy qurylǵylarmen júrgiziletin bolady. Adam faktoryn joiatyn osyndai tehnologiialar Qytai, Singapýr, Malaiziia, Gonkong jáne Ulybritaniia elderinde tabysty iske asyrylýda», - deidi ol.
Sondai-aq, qazirgi ýaqytta «Adal jol» jobalyq keńsesi «Qazaqstan temir joly» UK» AQ ortalyq apparaty men enshiles kompaniialarynyń qyzmetindegi jemqorlyq táýekelderine taldaý júrgizýde. Azamattar jemqorlyq táýekelderin azaitý jáne temirjol jolaýshylary men júk tasymaly salasyn jetildirý boiynsha óz usynystaryn adalzhol@bk.ru elektrondyq poshta mekenjaiyna nemese 8 702 447 74 02 nómirine jibere alady.
