Elimizdegi e-kommertsiia jyl saiyn 30 paiyzǵa artyp keledi. Bul týraly «Qazposhta» AQ Basqarma tóraǵasy Saken Sarsenov óziniń Facebook paraqshasynda jazdy.
«Qazaqstannyń elekrondyq saýda boiynsha úlken bolashaǵy bar. Jyl sanap 30 paiyzǵa ósip otyratyn salanyń biri – onlain saýda. Bul sala arqyly qomaqty qarajat tabýǵa múmkindik bar. Shynaiy mysal retinde aitsam, bizdiń Oljas Nuraldinov degen tutynýshymyz óziniń kompaniiasyn 2013 jyly ashqan bolatyn. Ol kezde ol seriktesimen birge jumys isteitin. Sol ýaqytta olar jylyna 15 myń jóneltim jiberetin. Sońǵy jyly atalǵan kompaniiadaǵy shtat sany 210-nan 360 qyzmetkerge deiin jetti. Qazirgi ai saiynǵy ainalymdary – 150 mln. teńgeni qurap otyr. Al búginde olar jylyna millionǵa jýyq taýar jóneltedi», – dedi S. Sarsenov.
Sondai-aq, ol elektrondyq saýdany damytý úshin jaqynda Astana mańyndaǵy Qaraǵandy-Astana tas jolynda fýlfilment ortalyǵynyń ashylýyn aitty.
«Bul ortalyq arqyly internet-dúken iesi qyzmetterdiń tolyq tsiklin ala alady (taýardy qabyldaý, saqtaý, jóneltý). Buǵan qosa, ol taýaryn qoimalarǵa saqtaý kezinde únemdilikke qol jetkizip, bailanys ortalyqtarynyń qyzmetin, logistikalyq jáne personaldyq qyzmetterdi jedeldete alady. Eń bastysy – tutynýshylarǵa taýary ýaqtyly jetkizilmek», – deidi ol.
Elordalyq ortalyqta búgingi tańda 20 internet-dúkenge qyzmet kórsetiledi eken. Osyǵan sáikes, 600 myń taýar túri qoimada saqtaýly tur. Jyldyń basynan beri munda 700 myńnan astam taýar saqtalyp, tutynýshylarǵa jetkizilgen.
Aita keterligi, atalmysh ortalyq memleketimizdegi elektrondyq saýdanyń órkendep, biznestiń damýyna yqpal etedi.
«Fýlfilment ortalyǵynyń negizinde internet biznespen ainalysatyn kásipkerlerdiń isi damityn bolady. Bul ortalyq kásip ielerine kóptegen qyzmet túrlerin usynady. Máselen, taýardy jinaqtaý, suryptaý, taýardy jóneltý, IT-mamandardyń qyzmetterin kórsetedi», – dep atap ótti «Qazposhta» AQ Basqarma tóraǵasy.
Onyń aitýynsha, Qazaqstan Úkimeti elimizdegi e-kommertsiiany damytý maqsatynda kóptegen jumystar atqaryp jatyr. Elektrondyq saýdany alǵa jyljytýǵa arnalǵan memlekettik baǵdarlama da bar. 1-shi qańtardan bastap kásipkerler tólemdi onlain format arqyly júzege asyratyn bolady. Munyń ózi internet-dúken ieleri úshin aitarlyqtai kómek.
