Elektr energiiasyn orynsyz paidalanǵany úshin «Astana AEK» AQ basqarma tóraǵasynyń orynbasary men onyń birqatar baǵynyshty qyzmetkeri sottaldy. Bul týraly AntikorNEWS alańynda QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Bekaidarov aitty, dep habarlaidy QazAqparat.
Nur-Sultan qalasy boiynsha Sybailas jemqorlyqqa qarsy qyzmet «Astana AEK» AQ-nyń senip tapsyrylǵan elektr energiiasyn iri mólsherde jumsaý faktisi boiynsha basqarma tóraǵasynyń orynbasary A.B.Túsipbekovke, sondai-aq onyń baǵynyshty qyzmetkerleri – AQ ýchaske bastyqtary R.G.Borisovke, B.E.Jaqypovqa jáne elektr energiiasyn tutynýdy baqylaý qyzmetiniń bastyǵy Q.B.Qorabaevqa qatysty sotqa deiingi tergeý júrgizgen bolatyn.
«Sotqa deiingi tergeý barysynda kúdiktiler 13,7 mln teńge, al kásipkerlik sýbektiler 60,3 mln teńge somasyndaǵy zalaldy tolyq kólemde ótedi», - deidi QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Bekaidarov.
Onyń aitýynsha, 6 qańtar kúni Nur-Sultan qalasy Almaty aýdanynyń №2 aýdandyq sotynyń úkimimen kináliler QR QK 189-babynyń 3-bóligi, 1,3-tarmaqtary jáne QR QK 189-babynyń 3-bóligi, 3-tarmaǵy boiynsha sottalǵan.
«Jazany óteýdiń barlyq merzimi ishinde sottalǵan adamdy jylyna 100 saǵatqa májbúrlep eńbekke tarta otyryp, árqaisyna 3 jyl 6 aiǵa bas bostandyǵyna shekteý jazasy taǵaiyndaldy», - deidi ol.
