QR Eńbek jáne halyqty áleýmettik qorǵaý ministri Mádina Ábilqasymova soltústik óńirlerge qonys aýdarýshylarǵa qoldaý kórsetý sharalary jetildiriletini týraly aitty, dep habarlaidy QazAqparat.
«Jumys kúshi jetispeitin soltústik óńirlerdiń ekonomikasyn qamtamasyz etý úshin jumys kúshi artyq óńirlerden erikti túrde qonys aýdarýdy yntalandyrý sharalary qabyldanyp jatyr. 2017-2018 jyldary 2,3 myń otbasy nemese 7,8 myń adam qonys aýdardy. Eńbekke qabiletti jastaǵy qonys aýdarýshylardyń 60 paiyzynan astamy jumysqa ornalastyryldy. Sonymen qatar, ministrlik tarapynan baǵdarlamanyń iske asyrylý tiimdiligine júrgizilgen monitoring onyń tetikterin jetildirý jáne jergilikti atqarýshy organdar tarapynan baqylaýdy kúsheitý qajet ekenin anyqtady. Máselen, qysqa merzimdi kásiptik kýrstardy aiaqtaǵannan keiin, jumysqa ornalastyrý tolyq qamtamasyz etilmeidi. Jańa turǵylyqty jerge kóshken kezde turǵyn úimen qamtamasyz etý máselesi týyndaidy», - dedi ministr.
M. Ábilqasymovanyń sózine qaraǵanda, qoldanystaǵy quraldardyń tiimdiligi arttyrý úshin ministrlik baǵdarlamaǵa tiisti ózgeristerdi daiyndady.
«Qysqa merzimdi kásiptik oqytý mindetti túrde jumysqa ornalastyrýǵa baǵdarlanatyn bolady. Oqý oryndaryna qoiylatyn talaptar kúsheitiledi jáne eńbek naryǵyndaǵy suranysqa qarai mamandyqtar qaita qaralady. Onlain oqytý múmkindigi kózdeldi. Aýyldarda iakorly kooperatsiia boiynsha jańa qural damytyla bastaidy, ol kredit alýshylardyń óz ónimin mindetti túrde satýyn qamtamasyz etedi», - dep naqtylady vedomstvo basshysy.
Onyń atap ótýinshe, qonys aýdarýshylardyń máselelerin keshendi túrde sheshý úshin baǵdarlamanyń jáne «Máńgilik el jastary - Indýstriiaǵa!» («Serpin»-avt.) jobasynyń qonys aýdarýshylardy qoldaý quraldary integratsiialanady. Turǵyn úi salý jáne satyp alý arqyly qonys aýdarýshylardy turǵyn úimen qamtamasyz etýdiń jańa tetigi ázirlenýde. Mehanizm Soltústik Qazaqstan oblysynda qanatqaqty aprobatsiiadan ótkizile bastady.
«Aǵymdaǵy jylǵy qazanda baǵdarlamaǵa tiisti ózgerister engizý josparlanǵan», - dep túidi Mádina Ábilqasymova.
