Abai aýylynda 7 jasar balany zorlaýǵa qatysty is boiynsha qylmystyq ister jónindegi mamandandyrylǵan aýdanaralyq sot úkim shyǵardy, dep habarlaidy Sputnik Qazaqstan tilshisi.
Sot aldyna kelgen jalǵyz aiyptalýshy — 2002 jyly týǵan jasóspirim 7 jylǵa bas bostandyǵynan aiyryldy. Ol jazasyn kámelettik jasqa tolmaǵandarǵa arnalǵan orta qaýipsizdik deńgeiindegi mekemede óteitin bolady.
Sottalǵan balanyń sheshesi úkimmen kelispeidi, ol sot sheshimin appeliatsiiaǵa bermek. Al jábirlenýshi taraptyń sot úkimine kóńili tolady.
Abai aýylyndaǵy 7 jasar balany zorlaýǵa qatysty is boiynsha sot protsesi Shymkentte qyrkúiek aiynyń sońynda bastalǵan bolatyn. Sot protsesi jabyq rejimde ótti. Áýelde bul is boiynsha tórt kúdikti edi. Biraq jynystyq sipattaǵy zorlyq-zombylyq jasaǵany úshin 14 jastan bastap qana jaýapqa tartylady. Qylmys jasalǵan sátte tek bireýi ǵana osy jasta bolǵan. Onyń áreketi qylmystyq kodekstiń 121-baby 4-tarmaǵy (kámelettik jasqa tolmaǵan balaǵa qatysty jynystyq sipattaǵy zorlyq-zombylyq) boiynsha saralandy. Qalǵandaryna qatysty 14 jasqa tolmaýyna bailanysty qylmystyq is toqtatyldy.
Búkil eldi dúrliktirgen atyshýly oqiǵa
Byltyr kóktemde 7 jasar balanyń zorlanǵany týraly taraǵan aqparat kúngei jurtshylyǵyn ǵana emes, búkil eldi dúrliktirdi. Túrkistan oblysy Saryaǵash aýdany Abai aýylynda birinshi synypta oqityn oqýshyny ózinen 7-8 jas úlken tórt oqýshy bes-alty ai boiy zorlap kelgen. Bala bul jait týraly otbasyna 2017 jyly tamyzda aitqan eken. Týǵan-týysqandary birneshe márte politsiiaǵa baryp, mekemeniń tabaldyryǵyn tozdyrsa da, tártip saqshylary aryzdy tek qańtar aiynda qabyldaǵan. Istiń júrýine aýdandyq bilim bólimi men quzyrly organdar barynsha qarsylyq tanytqan.
Qoǵam narazylyǵyn týdyrǵan oqiǵadan keiin birneshe sheneýnik jaýapqa tartylyp, jumystan shettetildi. Qulaq estip, kóz kórmegen sumdyq jaily Qazaqstan prezidenti de aitqan bolatyn.
"Is uzaqqa sozylyp, týǵan-týysqandaryn áýre-sarsańǵa saldy. Báribir eshteńe taba almai, dáleldei almadyq. Nege ekenin bilesizder me? Barlyq jerde týysqandary otyrǵan. Bul ispen ainalysqan politseiler de – týystary, joǵary organdarda da týystar, odan joǵaryda da – týystary, bári isti jabý úshin jasalǵan", — degen edi Nursultan Nazarbaev "Nur Otan" partiiasy saiasi keńesiniń keńeitilgen otyrysynda.
Búldirshinniń zorlanǵan-zorlanbaǵanyn anyqtaý úshin halyqaralyq sarapshylar da tartylǵan-tyn.
Zorlanǵan balanyń naǵashy ájesi qazir balanyń Almatyda anasymen birge turyp jatqanyn aitty. Sol jaqta mektepte oqidy.
"Turmys jaǵdaiymyzǵa bailanysty Almatyǵa baryp turýǵa múmkindigimiz joq. 4 ailyq kezinen qolyma alyp, ósirgen balam ǵoi. Saǵynamyn", — deidi ol.
