Ulttyq ekonomika ministri Álibek Qýantyrov Qazaqstan aýmaǵynan zańsyz shyǵarylǵan kapital 100 mlrd dollardan asýy múmkin ekenin aitty, dep habarlaidy QazAqparat.
«Shetelge zańsyz shyǵarylǵan kapitaldyń somasy týraly aitsaq, ol qandai ýaqyt kezeńi qaralyp otyrǵanyna bailanysty. Biraq bul jerde birneshe ondaǵan milliard dollar jaiynda sóz bolyp otyr. Onyń bári qalai qaitarylatynyna kelsek, munda túrli mehanizmder bar. Jańa tásilderdi qarasaq, salyqtyq jáne salyqtyq emes yntalandyrý sharalary qaralǵan. Salyqtyq yntalandyrý boiynsha belsendi jumys istep jatyrmyz. Bul baǵyt boiynsha eki jaqtan isti bastadyq. Birinshi baǵyt - kapitaldy syrtqa zańsyz shyǵarýdyń jolyn kesý bolyp sanalady. Mysaly, salyqtyq sharanyń biri – investor tólemegen dividendtiń jeńildikterin alyp tastai alamyz», - dedi ministr ortalyq kommýnikatsiialar qyzmetinde ótken brifingide.
Onyń aitýynsha, bul baǵytta kapitaldy qaitarýǵa yntalandyrý sharalary da pysyqtalyp jatyr.
«Tikelei sheteldik investitsiia tartýdy aitsaq, 30 jylda 400 mlrd dollardan astam qarajat tartylǵan. Bul jerde de osyndai tásilmen qaraý kerek. 1 mlrd dollar ǵana emes ekeni túsinikti. Naqty somasyn aitý óte kúrdeli. Biraq shamamen 100 mlrd dollardan sál kóp bolatyn shyǵar», - dedi Álibek Qýantyrov.
