Eldegi tártipsizdikter tasasynda kim tur. Bul saýalǵa «Habar» telearnasyna suhbat bergen Memleket basshysy Qasym-Jomart Toqaev jaýap berdi, dep habarlaidy QazAqparat.
«Muny tergeý kórsetedi. Tergeý barysynyń aldyn oraǵym kelmeidi. Bul durys ta bolmaidy. Jumys ta óte kóp. Sodyrlardyń kópshiligi, onyń ishinde olardyń komandirleri Almatydan ketip úlgerdi. Bireýler aýyldyq jerlerge sińisip ketse, endi biri shekarany kesip ótti. Kórshi elderge de ketip qalǵandary bar. Endi bireýleri túrlerin ózgertip, jasyrynyp júr. Olardyń saqaldaryn qyryp, syrtqy túrlerin ózgertkeni, azamattyq tulǵaǵa ainalǵany týraly faktiler de bar. Eger olardy tutqynǵa alsa, olar «biz tosynnan ótip bara jatqan adamdarmyz» dep attan salady. Bulai bolmaidy. Talqandalǵan dúnie aýqymyn Almatydan ózderińiz de kórdińizder. Al sodan keiin bári de tosynnan ótip bara jatqan adam bola qaldy», - dep atap ótti Memleket basshysy.
Qazaqstan Prezidenti «tosynnan zańsyz ustalǵan azamattardyń» bar ekenin, olarǵa qatysty kúsh qoldaný áreketteri tyńǵylyqty tergeletinin aitty.
«Iaǵni, munyń mán-jaiyn tyńǵylyqty túrde anyqtaý qajet», - dedi Qasym-Jomart Toqaev.
