QR Premer-Ministriniń orynbasary Eraly Toǵjanov eldegi máiithanalardyń qaýipsizdigi kúsheitiletinin málim etti, dep habarlaidy QazAqparat.
Ortalyq kommýnikatsiialar qyzmetinde ótken brifingide BAQ ókili eldegi tártipsizdikter barysynda máiithanalardan múrdelerdiń urlanǵanyna qatysty resmi málimetti eske salyp, atalmysh nysandardyń qaýipsizdigi boiynsha saýal qoidy.
«Onyń bárine qazir tapsyrma berilgenin bilesizder. Qasym-Jomart Kemeluly tikelei tapsyrma berdi. Oǵan bailanysty memlekettik organdardyń bári josparyn jasap jatyr. 51-den astam naqty tapsyrma júkteldi. Sonyń ishinde siz kótergen másele de bar. Sondyqtan onyń bári bolashaqta retteledi. Kemshilikter bolmady dep aita almaimyz. Kemshilikter bolǵanyn da jaqsy bilemiz. Sonyń bárin eskere otyryp, bolashaqta qaýipsizdikterin qamtamasyz etýge bailanysty búkil sharalardyń qabyldanatynyna eshqandai kúmánim joq», - dedi Premer-Ministrdiń orynbasary.
Atalmysh brifingide Eraly Toǵjanov koronavirýsqa qarsy qazaqstandyq vaktsinany tirkeý 2022 jyldyń sońyna qarai bastalýy múmkin ekenin atady.
«Sizder túsinýlerińiz kerek. Naqty ólshemder bar. Qazaqstan basynda Ulttyq retteýshiniń birinshi deńgeiinde bolǵan. Segiz aidyń ishinde ekinshi deńgeige shyqtyq. Endi sony 2022 jyldyń aiaǵyna qarai úshinshi deńgeige jetkizý mindeti qoiylyp otyr. Qazaqstan Ulttyq retteýshiniń úshinshi deńgeiine jetken kezde bizdiń vaktsinany Dúniejúzilik densaýlyq saqtaý uiymy resmi túrde qaraityn bolady. Bul – halyqaralyq standarttar, bul – talap», - dedi ol BAQ ókiliniń saýalyna bergen jaýabynda.
