قر پرەمەر-مينيسترٸنٸڭ ورىنباسارى ەرالى توعجانوۆ ەلدەگٸ مەيٸتحانالاردىڭ قاۋٸپسٸزدٸگٸ كٷشەيتٸلەتٸنٸن مەلٸم ەتتٸ, دەپ حابارلايدى قازاقپارات.
ورتالىق كوممۋنيكاتسييالار قىزمەتٸندە ٶتكەن بريفينگٸدە باق ٶكٸلٸ ەلدەگٸ تەرتٸپسٸزدٸكتەر بارىسىندا مەيٸتحانالاردان مٷردەلەردٸڭ ۇرلانعانىنا قاتىستى رەسمي مەلٸمەتتٸ ەسكە سالىپ, اتالمىش نىسانداردىڭ قاۋٸپسٸزدٸگٸ بويىنشا ساۋال قويدى.
«ونىڭ بەرٸنە قازٸر تاپسىرما بەرٸلگەنٸن بٸلەسٸزدەر. قاسىم-جومارت كەمەلۇلى تٸكەلەي تاپسىرما بەردٸ. وعان بايلانىستى مەملەكەتتٸك ورگانداردىڭ بەرٸ جوسپارىن جاساپ جاتىر. 51-دەن استام ناقتى تاپسىرما جٷكتەلدٸ. سونىڭ ٸشٸندە سٸز كٶتەرگەن مەسەلە دە بار. سوندىقتان ونىڭ بەرٸ بولاشاقتا رەتتەلەدٸ. كەمشٸلٸكتەر بولمادى دەپ ايتا المايمىز. كەمشٸلٸكتەر بولعانىن دا جاقسى بٸلەمٸز. سونىڭ بەرٸن ەسكەرە وتىرىپ, بولاشاقتا قاۋٸپسٸزدٸكتەرٸن قامتاماسىز ەتۋگە بايلانىستى بٷكٸل شارالاردىڭ قابىلداناتىنىنا ەشقانداي كٷمەنٸم جوق», - دەدٸ پرەمەر-مينيستردٸڭ ورىنباسارى.
اتالمىش بريفينگٸدە ەرالى توعجانوۆ كوروناۆيرۋسقا قارسى قازاقستاندىق ۆاكتسينانى تٸركەۋ 2022 جىلدىڭ سوڭىنا قاراي باستالۋى مٷمكٸن ەكەنٸن اتادى.
«سٸزدەر تٷسٸنۋلەرٸڭٸز كەرەك. ناقتى ٶلشەمدەر بار. قازاقستان باسىندا ۇلتتىق رەتتەۋشٸنٸڭ بٸرٸنشٸ دەڭگەيٸندە بولعان. سەگٸز ايدىڭ ٸشٸندە ەكٸنشٸ دەڭگەيگە شىقتىق. ەندٸ سونى 2022 جىلدىڭ اياعىنا قاراي ٷشٸنشٸ دەڭگەيگە جەتكٸزۋ مٸندەتٸ قويىلىپ وتىر. قازاقستان ۇلتتىق رەتتەۋشٸنٸڭ ٷشٸنشٸ دەڭگەيٸنە جەتكەن كەزدە بٸزدٸڭ ۆاكتسينانى دٷنيەجٷزٸلٸك دەنساۋلىق ساقتاۋ ۇيىمى رەسمي تٷردە قارايتىن بولادى. بۇل – حالىقارالىق ستاندارتتار, بۇل – تالاپ», - دەدٸ ول باق ٶكٸلٸنٸڭ ساۋالىنا بەرگەن جاۋابىندا.
