© Photo : pixabay / congerdesign
Biyl qańtar–tamyz ailarynda iri qara, shoshqa, qoi, eshki, jylqy jáne jylqytektes janýarlardyń jas nemese tońazytylǵan etin óndirý 46,8 myń tonnany qurady, bul ótken jyldyń sáikes kezeńimen salystyrǵanda 8,7% kóp, dep habarlaidy Sputnik Qazaqstan agenttigi Energyprom.kz portalyna silteme jasap.
Úi sharýashylyqtarynda et tutynýy birinshi jartyjyldyqta 2021 jyldyń sáikes kezeńimen salystyrǵanda 2,6% ósip, orta eseppen jan basyna shaqqanda 19,5 kg qurady. Bul rette aýyldyq jerlerde orta eseppen jan basyna shaqqanda 20,9 kg et (2,4% kóbeigen), qalalyq jerlerde 18,5 kg 2,9% kóbeigen) tutynylǵan.
2022 jyldyń qańtar–maýsym ailarynda Qazaqstanda et tutynýdyń negizgi kólemi siyr etine tiesili: orta eseppen jan basyna shaqqanda 12 kg — 2021 jyldyń birinshi jartyjyldyǵymen salystyrǵanda 2,1% artyq. Odan keiin jylqy eti men qoi eti keledi: sáikesinshe 3,2 kg jáne 2,6 kg. Shoshqa eti orta eseppen jan basyna shaqqanda 1,7 kg boldy.
Biylǵy qyrkúiek aiynyń qorytyndysy boiynsha, et baǵasy túrlerine qarai bir aida 0,6%-dan 1,8%-ǵa deiin, bir jylda 7%-dan 15%-ke deiin qymbattady.
Súiegi bar siyr etiniń baǵasy bir aidyń ishinde aitarlyqtai ósti — 1,8%. Shoshqa eti 1,5%, jylqy eti 1,3% qymbattady. Qoi etiniń baǵasy eń az qymbattady — 0,6% ǵana.
Jyldyq dinamika boiynsha jylqy eti aitarlyqtai qymbattady — 15%. Qoi men shoshqa eti 12,7%, qazaqstandyqtar kóp jeitin siyr eti 7% qymbattady.
2022 jyldyń qyrkúieginde qalalarda súiegi bar siyr etiniń bólshek saýdadaǵy kilosy ortasha eseppen 2387 teńge, qoi eti 2660 teńge, shoshqa eti 2033 teńge, jylqy eti 2932 teńge boldy.
