Qazaqstannyń "saiasat sahnasynda" jańa esim. Keshe ǵana «Birlik» degen ataýmen tanymal bolǵan partiia rebrending jasap, «Adal» bop ózgerdi. Bul ózgeris - Májilis pen máslihat sailaýynyń aldyndaǵy kútpegen hám kóp talqylanǵan oqiǵalardyń biri bolǵany anyq. Osy oraida eldiń de, bizdiń de kókeiimizde kóp suraq týyndady.
Endeshe, búgin biz qaita jańdanyp, saiasi ómirdegi jumysyna jańa kúshpen oralǵan uiym jetekshisimen bolǵan suhbatty oqyrman nazaryna usynamyz! Marhabat!
- Armysyz, Eldar Tynyshbaiuly! Kúni keshe «Birlik» partiiasy ataýyn ózgertip, «Adal» atandy. Tóraǵanyń sózine sensek, kásibi áleýmettanýshylar ataýdy ózgertý týraly zertteý júrgizgen jáne onǵa jýyq ataýdyń ishinen partiianyń belsendi músheleri sońynda osy nusqaǵa toqtalypty. Iaǵni, partiia bul sheshimdi «halyqtyń tańdaýy» dep túsindirip otyr. Aityńyzshy, rebrendingtiń ózge bir saiasi astary bar ma?
- Sóz basynda aita keterim, bizdiń partiianyń basty qundylyǵy - eń aldymen adam kapitaly. Sondyqtan biz azamattarymyzdyń usynys-tilekterin, turmystyq, áleýmettik qajettilikterin tyńdaýǵa basa nazar aýdaramyz.
Al saýalyńyzǵa kelsem, iá, kásibi áleýmettik sarapshylar tiisti zertteý jumystaryn júrgizdi. Olar muny halyqtyń jańarýy men ádilettilikti talap etýinen týǵan ataý dep túsindirdi. Bul bizdiń de oiymyzben úilesim tapty. Qazirgi qoǵamnyń azamattary «ádilettilik» uǵymnyń aiasyna kóp nárseni syiǵyzady. Máselen, sybailas jemqorlyqqa qarsy kúresten bastap, ult taǵdyryna qatysy bar árbir istiń sheshimin qabyldaýda ashyqtyqqa deiingi dúnielerdi atap aitýǵa bolady. Osy ispetti faktorlardyń barlyǵyn eskere otyryp, partiianyń ataýyn ózgertý týraly usynysymyzdy saiasi keńes músheleriniń daýys berýine jiberdik. Atalǵan bastama biraýyzdan qabyldanyp, ózderińizge málim toqtamǵa keldik.
Saýalnamaǵa 183 respýblikalyq, oblystyq, aýdandyq jáne jergilikti mańyzy bar barlyq qaladan 18 jastan bastap daýys berý quqyǵy bar turǵyndar qatysty, al reprezentativtik irikteý 10 myńnan astam adamdy qurady.
Jalpy, biz ómir súrip jatqan qoǵamnyń túiindi máseleleri jeterlik. Biz solardyń sheshimin tabýyna úlesimizdi qosý úshin osyndai zor serpinmen bilek sybana iske kirispekpiz. Bul sheshimimizden saiasi astar izdegennen góri, eldik, ulttyq muratqa umtylystyń kórinisin ańǵarǵan abzalyraq.
- Áleýmettik jelilerden baiqaǵanyńyzdai, qoǵam ishinde buǵan deiin “tasada bolǵan” partiia jumysynyń qaita jandanýyn túsinbei, teris pikir bildirip, «baiaǵy jartas - sol jartas» dep synaýshylar da bar. «Partiia bastapqyda qandai boldy, solai bolyp qala beredi» degen jazbalardy da kezdestirdik. «Adaldyń» bul júrisi, iaki saiasat sahnasyna “qaita oralýy” - sailaý aldyndaǵy birkezeńdik boi kórsetý me, álde naqty perspektivaly saiasi ambitsiialardyń kórinisi me?
- Oryndy aitylǵan synnan kóbinese kóńil qýantatyn nátije shyǵady. Keide maqsat-múddesi quityrqy, teris piǵylmen nemese «tise terekke, timese butaqqa» degen syqyldy jatypatarlyqpen aitylatyn syn da bolatynyn umytpaǵan jón. Al bizdiń jaǵdaiymyzǵa kelsek, álbette bul uiym uzaqmerzimdi saiasi damýǵa baǵyt alýdy kózdeidi. Bizdiń búkil komandamyzdyń qatysýymen jasaǵan aiqyn da naqty baǵdarlamamyz bar. Muny negizsiz ýádeler deýge kelmeidi. Qarasha halyqtyń búginde ózekti dep tabylatyn qajettilikterin sheshýdiń naqty joldaryn usynamyz. Bul sózime kópshilik aldaǵy 16 qarasha kúni ótetin «Adal»partiiasynyń alqaly sezinen keiin senimdi bola túsedi.
Bizdiń komandanyń músheleri shetinen órshil, eńbekqor jáne jemisti nátijege jumys isteýdi biledi. Biz saiasi dodaǵa jańa kúshterimizben, ideialarymyzben, sheshimderimizben jáne reformalarymyzben shyǵýǵa saqadai saimyz. Memlekettik baǵdarlamalardyń el ishinde sátti jáne júieli júzege asýyna, buqaranyń turmystyq, áleýmettik ahýalynyń jaqsarýyna, elimizdiń ekonomikalyq, agrarlyq sektorynyń qarqyndy damýyna, bilim, sport, mádeniet, rýhaniiat syndy túrli salalardyń qaryshty ilgerileýine, ulttyq qundylyqtarymyzdyń jańǵyrýyna bizdiń árbir múshemiz múddeli jáne soǵan tamshydai bolsa da, úles qosa alatyndyǵyna senimim zor.
- Siz jetekshilik etetin partiianyń eldegi basqa saiasi uiymdardan ereksheligi qandai?
- Bizdiń ustanymymyz ashyqtyq pen jariialylyqqa negizdelgen. Bul – damýdyń dańǵyl jolyna túsken árbir memlekettegi saiasi uiymdardyń ustanymy. Biz de sondai halyqqa jaǵymdy úrdisten jańylmaýdy kózdeimiz. Partiia qandai sheshimin qabyldarda da tikelei halyqpen keńesedi. Mysaly, bizdiń uiymnyń belsendileri 6,3 myń eldi mekenniń turǵyndaryn alańdatyp otyrǵan áleýmettik máseleler boiynsha derekter jinady. Al ol aýyldarda shamamen 7 mln azamat turady.
- Partiia quramy jańa múshelermen tolyqqanynan habardarmyz. Olardyń arasynda belgili jýrnalist, sportshy, bloger jáne qoǵam qairatkerleri bar. Bul - partiiany qoǵam ishinde tanymal qylýdyń bir ádisi me, álde sol qoǵamǵa jaqyn bolýdyń joly ma?
- Biz tek óziniń tanymaldyǵyna jumys isteitin adamdarmen qatarymyzdy «toltyrý» maqsatyn kózdegen emespiz. Partiianyń árbir jańa múshesi – eliniń bolashaǵy úshin alańdaityn naǵyz patriottar. Bizdi «Árbir otandasymyz barlyq jaǵynan órkendeýi kerek» degen oi biriktiredi. Ár turǵynnyń ómir súrý sapasy jaqsy bolý úshin, eń aldymen jaily baspana qajet. Sodan soń árkimniń keregine jaraityn zamanaýi bilim, turaqty jumys, jarqyn bolashaq, laiyqty jalaqy kerek. Osynyń bári bizdiń partiiamyzdyń baǵdarlamasynda qamtylǵan. Bárimizdiń maqsat-muratymyz osyndai igilikterge negizdelgen.
Partiianyń árbir múshesi – óz salalarynyń myqty mamandary nemese beldi músheleri. Al olar ortaq iste kúsh-jigerlerin qazaqstandyqtardyń ál-aýqatyn kóterýge jumsaǵylary keledi.
- «Depýtattyqqa úmitker saiasi partiialar tizimindegi áielder men jastardyń úlesi 30 paiyzdy quraýy kerek» degen zańnamalyq talaptan habardar bolarsyz? Siz jetekshilik etetin partiia 30 paiyzdyq kvotany tolyǵymen qoldana ma? Jastardyń úlesi qansha?
- Árine! Bizdiń partiia osy talaptardy oryndaidy. Bizdiń qatarymyzda kóptegen jastar bar. Olardyń eń kishileri 26 jasta bolsa, burymdylarymyz da az emes. Árqaisysynyń usynysy, pikiri, paiymy biz úshin mańyzdy, árqaisysymen sanasamyz. Biz búgingidei transformatsiia men týrbýlenttik dáýirde jastarǵa erekshe nazar aýdarý kerek ekenin jaqsy túsinemiz. Óitkeni olar ár kezeńge nemese ýaqytqa tez beiimdelýge qabiletti. Biz keiingi býynǵa elimizdi basqarýǵa, erteńimizdiń tutqasyn ustaýǵa, týymyzdy kóterýge múmkindik berýimiz kerek.
- Jaqynda ótken sezde partiia tóraǵasy: «Bizdiń partiia árqashan óz jumysyna orynsyz nazar aýdarýdan aýlaq boldy. Biz barlyǵynyń kóńilinen shyǵýdy maqsat etpeimiz. Bizdiń partiia – naqty isterdiń partiiasy» degendi aitty. Endeshe, partiia qolǵa alǵan mańyzdy jumystar men bolashaqta júzege asyrylatyn bastamalaryńyz týraly aita alasyz ba? («Adal» partiiasy men Ekologtar qaýymdastyǵy arasynda yntymaqtastyq týraly memorandýmǵa qol qoiyldy. Siz osy qujattyń aiasynda qandai bastamalar kótergińiz keledi?)
- Ýaqyt bólip, suhbat berýge keliskenińiz úshin alǵys bildiremiz!
