"Aýyl – el besigi" baǵdarlamasyn bekitý nege kesheýildep jatqanyn túsindire almaǵan Ulttyq ekonomika vitse-ministri Májilis tóraǵasy Nurlan Nyǵmatýlinnen sóz estidi, dep habarlaidy Sputnik Qazaqstan tilshisi.
Búgin májilistiń jalpy otyrysynda agroónerkásiptik keshendi retteý máseleleri týraly zań jobasy qaraldy. Suraq-jaýap barysynda depýtat Roman Kim Ulttyq ekonomika ministrliginiń ókilinen "Aýyl – el besigi" arnaiy jobasynyń nege áli kúnge deiin bekitilmegenin surady. Aita ketsek, byltyr qazan aiynda Qazaqstannyń Tuńǵysh Prezidenti – Elbasy Nursultan Nazarbaev "Rýhani jańǵyrý" baǵdarlamasy aiasynda "Aýyl – el besigi" jobasyn ázirleýdi tapsyrǵan bolatyn.
"Ol óndiristi keńeitip qana qoimai, aýyl halqynyń turmysyn jaqsartýǵa múmkindik beredi. Osy maqsatqa jol qurylysyna bólingen 160 milliard teńge men aýyz sýmen qamtamasyz etýge baǵyttalǵan 100 milliard teńgeni qospaǵanda, 2019-2021 jyldar aralyǵynda 90 milliard teńge bólinip otyr. El úshin zor mańyzǵa ie jobany ázirleý men bekitý nege keshiktirilip jatyr?", - dep surady májilismen.
Ulttyq ekonomika vitse-ministri Ermek Alpysov "Aýyl – el besigi" jobasy boiynsha qazir atalǵan ministrlik ákimshi ekenin atap ótti. Aitýynsha, 6,5 myń eldi mekenniń ishinen keleshegi bar 1781 aýyl anyqtalǵan.
"Osy aptanyń sońyna deiin joba tizimin tolyǵymen aiaqtaimyz. Biyl 30 milliard teńgege 500 jobany iske asyrý josparlanyp otyr... Qazir óńirlik standarttar júiesi ázirlengen, ol ádilet ministrliginde tirkeýde jatyr. Ákimder dál osy óńirlik standarttar negizinde jumys isteidi", - dedi Alpysov.
Májilis tóraǵasy Nurlan Nyǵmatýlin vitse-ministrdiń jaýabyna qanaǵattanbady.
"Elbasy byltyr kúzde tapsyrma berdi. Búgin Qasym-Jomart Kemeluly ákimdermen jiyn ótkizip, óńirlerdegi infraqurylymdyq jobalarǵa basa nazar aýdardy. Al siz qazir memlekettik organdardyń bir qaǵazdy kelise almai jatqanyn aityp otyrsyz. Biz qazir naýryz aiyndamyz, jarty jyl ótti. Nege kesheýildep jatyr?", - dep surady Májilis spikeri.
"Biz aimaqtardyń óńirlik standarttardy ustanǵanyn qalaimyz. Osy apta tolyǵymen tirkep, baǵdarlamany iske qosamyz", - dep sendirdi Alpysov.
Biraq bul jaýap ta Nyǵmatýlinniń kóńilinen shyqpady.
"Ermek Amantaiuly, suraqty estip tursyz ba? Aqsha bólindi, depýtattar úsh jyldyq biýdjetti bekitti. Aqsha bar, ákimder de, óńirler de daiyn. Problema nede? Bir japyraq qaǵazdy bir memlekettik organnan ekinshisine jetkizýge jarty jyl jumsaisyzdar?!... Ótken jyldyń sońyna deiin aiaqtaý týraly tapsyrma berildi. Naýryzda jumys bastalýy kerek bolatyn, óńirlerde tender ótkizilýi tiis edi. Al siz maǵan taǵy bir juma týraly áńgime aityp otyrsyz", - dep ashýlandy ol.
Alpysov baǵdarlamany kóp uzamai bekitemiz dep sendirdi.
"Bekitpei qaida barasyz? Baryp turǵan jaýapsyzdyq bul, túsinesiz be?! Bulai jumys isteýge bolmaidy, Ermek Amantaiuly. Iske kirisińiz", - dep eskertý jasady Nyǵmatýlin.
