"اۋىل – ەل بەسٸگٸ" باعدارلاماسىن بەكٸتۋ نەگە كەشەۋٸلدەپ جاتقانىن تٷسٸندٸرە الماعان ۇلتتىق ەكونوميكا ۆيتسە-مينيسترٸ مەجٸلٸس تٶراعاسى نۇرلان نىعماتۋليننەن سٶز ەستٸدٸ, دەپ حابارلايدى Sputnik قازاقستان تٸلشٸسٸ.
بٷگٸن مەجٸلٸستٸڭ جالپى وتىرىسىندا اگروٶنەركەسٸپتٸك كەشەندٸ رەتتەۋ مەسەلەلەرٸ تۋرالى زاڭ جوباسى قارالدى. سۇراق-جاۋاپ بارىسىندا دەپۋتات رومان كيم ۇلتتىق ەكونوميكا مينيسترلٸگٸنٸڭ ٶكٸلٸنەن "اۋىل – ەل بەسٸگٸ" ارنايى جوباسىنىڭ نەگە ەلٸ كٷنگە دەيٸن بەكٸتٸلمەگەنٸن سۇرادى. ايتا كەتسەك, بىلتىر قازان ايىندا قازاقستاننىڭ تۇڭعىش پرەزيدەنتٸ – ەلباسى نۇرسۇلتان نازارباەۆ "رۋحاني جاڭعىرۋ" باعدارلاماسى اياسىندا "اۋىل – ەل بەسٸگٸ" جوباسىن ەزٸرلەۋدٸ تاپسىرعان بولاتىن.
"ول ٶندٸرٸستٸ كەڭەيتٸپ قانا قويماي, اۋىل حالقىنىڭ تۇرمىسىن جاقسارتۋعا مٷمكٸندٸك بەرەدٸ. وسى ماقساتقا جول قۇرىلىسىنا بٶلٸنگەن 160 ميلليارد تەڭگە مەن اۋىز سۋمەن قامتاماسىز ەتۋگە باعىتتالعان 100 ميلليارد تەڭگەنٸ قوسپاعاندا, 2019-2021 جىلدار ارالىعىندا 90 ميلليارد تەڭگە بٶلٸنٸپ وتىر. ەل ٷشٸن زور ماڭىزعا يە جوبانى ەزٸرلەۋ مەن بەكٸتۋ نەگە كەشٸكتٸرٸلٸپ جاتىر?", - دەپ سۇرادى مەجٸلٸسمەن.
ۇلتتىق ەكونوميكا ۆيتسە-مينيسترٸ ەرمەك الپىسوۆ "اۋىل – ەل بەسٸگٸ" جوباسى بويىنشا قازٸر اتالعان مينيسترلٸك ەكٸمشٸ ەكەنٸن اتاپ ٶتتٸ. ايتۋىنشا, 6,5 مىڭ ەلدٸ مەكەننٸڭ ٸشٸنەن كەلەشەگٸ بار 1781 اۋىل انىقتالعان.
"وسى اپتانىڭ سوڭىنا دەيٸن جوبا تٸزٸمٸن تولىعىمەن اياقتايمىز. بيىل 30 ميلليارد تەڭگەگە 500 جوبانى ٸسكە اسىرۋ جوسپارلانىپ وتىر... قازٸر ٶڭٸرلٸك ستاندارتتار جٷيەسٸ ەزٸرلەنگەن, ول ەدٸلەت مينيسترلٸگٸندە تٸركەۋدە جاتىر. ەكٸمدەر دەل وسى ٶڭٸرلٸك ستاندارتتار نەگٸزٸندە جۇمىس ٸستەيدٸ", - دەدٸ الپىسوۆ.
مەجٸلٸس تٶراعاسى نۇرلان نىعماتۋلين ۆيتسە-مينيستردٸڭ جاۋابىنا قاناعاتتانبادى.
"ەلباسى بىلتىر كٷزدە تاپسىرما بەردٸ. بٷگٸن قاسىم-جومارت كەمەلۇلى ەكٸمدەرمەن جيىن ٶتكٸزٸپ, ٶڭٸرلەردەگٸ ينفراقۇرىلىمدىق جوبالارعا باسا نازار اۋداردى. ال سٸز قازٸر مەملەكەتتٸك ورگانداردىڭ بٸر قاعازدى كەلٸسە الماي جاتقانىن ايتىپ وتىرسىز. بٸز قازٸر ناۋرىز ايىندامىز, جارتى جىل ٶتتٸ. نەگە كەشەۋٸلدەپ جاتىر?", - دەپ سۇرادى مەجٸلٸس سپيكەرٸ.
"بٸز ايماقتاردىڭ ٶڭٸرلٸك ستاندارتتاردى ۇستانعانىن قالايمىز. وسى اپتا تولىعىمەن تٸركەپ, باعدارلامانى ٸسكە قوسامىز", - دەپ سەندٸردٸ الپىسوۆ.
بٸراق بۇل جاۋاپ تا نىعماتۋليننٸڭ كٶڭٸلٸنەن شىقپادى.
"ەرمەك امانتايۇلى, سۇراقتى ەستٸپ تۇرسىز با? اقشا بٶلٸندٸ, دەپۋتاتتار ٷش جىلدىق بيۋدجەتتٸ بەكٸتتٸ. اقشا بار, ەكٸمدەر دە, ٶڭٸرلەر دە دايىن. پروبلەما نەدە? بٸر جاپىراق قاعازدى بٸر مەملەكەتتٸك ورگاننان ەكٸنشٸسٸنە جەتكٸزۋگە جارتى جىل جۇمسايسىزدار?!... ٶتكەن جىلدىڭ سوڭىنا دەيٸن اياقتاۋ تۋرالى تاپسىرما بەرٸلدٸ. ناۋرىزدا جۇمىس باستالۋى كەرەك بولاتىن, ٶڭٸرلەردە تەندەر ٶتكٸزٸلۋٸ تيٸس ەدٸ. ال سٸز ماعان تاعى بٸر جۇما تۋرالى ەڭگٸمە ايتىپ وتىرسىز", - دەپ اشۋلاندى ول.
الپىسوۆ باعدارلامانى كٶپ ۇزاماي بەكٸتەمٸز دەپ سەندٸردٸ.
"بەكٸتپەي قايدا باراسىز? بارىپ تۇرعان جاۋاپسىزدىق بۇل, تٷسٸنەسٸز بە?! بۇلاي جۇمىس ٸستەۋگە بولمايدى, ەرمەك امانتايۇلى. ٸسكە كٸرٸسٸڭٸز", - دەپ ەسكەرتۋ جاسادى نىعماتۋلين.
