Ońtústik Qazaqstan oblysynyń ákimi Janseiit Túimebaev barsha otandastardy qazaq tili álipbiin kirillitsadan latyn grafikasyna kóshýimen quttyqtady. Bul týraly ákim Astana men Almaty qalasynan kelgen beldi tarihshy, ǵalymdar men qoǵamtanýshylar qatysqan basqosýda aitty, dep habarlaidy "Ult aqparat" ákimniń baspasóz qyzmetine silteme jasap.
«Keshe Elbasymyz qabyldaǵan latyn álipbiine kóshý týraly Jarlyǵyn Qazaqstan Respýblikasyndaǵy eń úlken oqiǵanyń biri dep aitýǵa bolady. Bul latyn álipbiin qoldanýdy biz jańadan bastap jatqan joqpyz. Ótken ǵasyrdan tájirbiemiz bar. 1929-1940 jyl arasynda bizdiń ákelerimiz ben atalarymyz osy jazýdy qoldanǵan bolatyn. Mine, Prezidentimiz osy qaripke kóshýdi qaita jańǵyrtyp, usynylǵan latyn álipbiiniń jańa nusqasyn bekitti», - dedi aimaq basshysy.
Sonymen qatar, Janseiit Túimebaev jańa álipbidi qoldanysqa engizý boiynsha júrgiziletin jumystarda kedergiler bolmaitynyn aityp ótti.
«Bizdiń tarihymyzda kóne túrki jazýy, arab jazýy, latyn jazýy bári basymyzdan ótti. Al qazirgi jastarymyz aǵylshyn alfavitin jaqsy meńgerip alǵan. Sondyqtan da bul tájiribeni de biz igere alamyz. Bizde eshqandai qiyndyq týyndamaidy, úirenemiz. Bul bizdiń elimizdiń rýhani jańǵyrýyndaǵy jańa qadam dep esepteýge bolady. Elbasymyzǵa osy latyn álipbiine kóshý týraly bastamasy úshin alǵasymyzdy bildiremiz», - dep sózin túiindedi ákim.
Jiynǵa «Intellekt Orda» halyqaralyq áleýmettik-gýmanitarlyq zertteýlerdi yqpaldastyrý institýtynyń bas direktory, tarih ǵylymynyń doktory, professor, akademik - Sattar Májitov, Abylai han atyndaǵy halyqaralyq qatynastar jáne álem tilderi ýniversitetiniń pedagogika ǵylymdarynyń doktory, professor, akademik - Dina Júsibalieva, D.A.Qonaev atyndaǵy Eýraziialyq zań akademiiasynyń professory, filologiia ǵylymynyń doktory, akademik - Gúlmira Bilialova, «Áleýmettik zertteýler jónindegi áielder qaýymdastyǵy» QB prezidenti, Abylai han atyndaǵy Halyqaralyq qatynastar jáne álem tilderi ýniversitetiniń kafedra dotsenti, áleýmettik ǵylymdarynyń kandidaty, akademik - Tamara Klimova, T.Júrgenov atyndaǵy qazaq ulttyq óner akademiiasynyń , «Qazaqstan tarihy jáne áleýmettik ǵylym» kafedrasynyń dotsenti, tarih ǵylymynyń kandidaty - Mendyǵanym Shaimerdenova jáne 12 sarapshylar men ǵalymdar qatysyp otyr.
Sonymen qatar, kezdesýde taraptar Ońtústik Qazaqstan oblysynda rýhani jańǵyrý boiynsha arnaiy jobalardyń iske asyrylýy men onyń qazaqstandyq jáne halyqaralyq deńgeide nasihattalý jaiyn sóz etti.
Aita keteiik, Ońtústik Qazaqstan oblysynda «Bolashaqqa baǵdar: rýhani jańǵyrý» maqalasynyń aiasynda iske asatyn jobalar «Intellekt-ekspert» áleýmettik-ekonomikalyq zertteýler ortalyǵynyń ókilderimen birge júzege asatyn bolady. Olar oblysta etnosaralyq qarym-qatynasty, rýhani qundylyq pen mádeniettiń tabiǵatyn, óńirdiń migratsiialyq, iaǵni kóshi-qon protsesteri men qoǵamdyq sanany jańǵyrtý joldaryn halyqaralyq tájiribege súiene otyryp zertteý jáne saraptaý jumystaryn júrgizetin bolady. Ótetin is-sharalarǵa álemdik jáne qazaqstandyq tájiribeleri mol ǵalymdar men sarapshylar jáne Ońtústik Qazaqstan oblysynyń mamandary qatysady.
